Natuur in Hamborg

vun Katja Renfert


Vör 19 Johren bün ik in düssen Wahnblock introcken. De beiden Fruunslüüd vun de Wahnungen ünnen hebbt mi fragt, of ik uk Vermaak an Goornarbeid heff – kloor!

Al mit 4 ½ Johren heff ik flietig den Goorn vun mien Grootmodder schier maakt, un as mien Vadder as Dörpschoolmeister na Oldendörp in Schleswig-Holstein versett worrn weer, harrn wi en 1.000 m² grooten Goorn. Mien Öllern hebbt jeden vun uns veer Kinnern en Stück to'n Beplanten geven.


De Verfatersch, veerun'nhalv Johr oolt, bi de Goornarbeit. Klick op to'n Vergröttern!

De beiden Fruunslüüd harrn ünner ehrn Finstern vörn Blomen un Büsch anplant, un ik heff anfungen, an de niede Heck na un na wat antoplanten. Aver denn is een Fru wegtrokken, de annere kiekt mi intwischen villicht ut'n Himmel bi mien Goornpleeg to. De nieden Navers in uns Huus hebbt keen Tiet or keen Vermaak an Goornarbeid, un so maak ik allens alleen.


"Hummel Hummel!" seggt de Plüschmoors. Echt Hamborg even.

De Wahnungsbugesellschop hett för unsen Block Goornarbeiders, aver ik heff dat dörchsett, dat de mien Deel nich anfaten dörft! Dat heet, vörn vun unsen Ingang bit to'n neegsten un in'ne Eck achtern vun uns Huus maak ik dat! Bi mi gifft dat keen Püster, üm de Bläder wegtomaken, un ik maak uk de Heck un den Rasen. Dörbi acht ik dorop, dat mien lütten Hölpers, as de sööten Sünnenkinner, uk Glückskäfer nömt, nich toschannen kaamt. So'n lütten „Dino“ harr ik mol op mien Finger.


Huch, en Monster?! Nee, dat warrt mal en Marienkäver!

Achter unsen Huus is en groote Wisch mit verscheden Bööm, as Eberesche un Ahörner. Un so is dat nich utbleven, dat hier etliche Vageloorten, Kaninken un Katteker sünd. Op den Rasen sünd verscheden Blööm, ik heff hier immergröne Büsch, Doodholz un Kiefernzappen för de Insekten, un vörn un achtern lütte un groote Pött för de Vagels un Insekten to'n Drinken un Rümplantschen.


En echte Wildgoorn treckt masse Deerten an, ok in de Stadt.
Hier sünd 'n Amsel un en Dompfaff tosamen an't Plantschen

Liekers nu, as dat so hitt is, is dat bannig wichtig. Letzt bün ik uk extra mit de Iesenbahn na Wrist fohrt un heff dor in'ne Boomschool twee Cornus mas, also Kornelkirschbüsch, för de Immen köfft.


Ok em kannst in Hamborg drepen: Meister Buntspecht bi'n Wahnungsbu
(Wahnungsbu is opstunns en groot Thema in Hamborg!)

Kloor is dat allens 'n Barg Arbeit, liekers nu, wo dat so dröög weer. Jeden Morgen un jeden Avend literwies Ammers mit Water rünnertoschleppen (Slauch geiht nich in unse Wahnanlaag). Aver wenn ik seh, wo allens blöht, de Vagels mi mit ehrn Gesang al fröh an'n Morgen Freid maakt, achtern op de Wisch de Kaninken rümloopt un de Katteker sik vun Boom to Boom swingt, weet ik: dat is mien Bidrag, beten wat för de Natuur to doon.


En lütt Rasenmeiher in mien Goorn!


Mehr Fotos un Texte vun de Verfatersch hier: renfert.net

3.6.2018


na baven