Maandsteen

Vörstellt vun Anke Nissen


Tosamensetten:
Feldspat-Verbindung = K [AlS3 O6], also Kalifeldspat
Härte:

6 bit 6,5 (Diamant hett de Härte 10.)

Dichte:

2,54 - 2,56 g/cm³

Namen:

Moonstone = ingelsch Naam
Selenit = fälschlich Naam vun fröher

Natuur un Verwandte:

Feldspate tellt to de wichtigsten gesteinsbilden Mineralien.
Dat gifft dree Hauptgruppen:

  • Orthoklas = Kalifeldspat, de opalisieren Variante = Mondstein
  • Albi = Natronfeldspat
  • Anorthit = Calciumfeldspat


Maandsteen op Sied. Klick op to'n Vergröttern!

Kiekt een den Maandsteen in ene bestimmter Richtung an, süht man sienen interessanten, geheimnisvullen Schimmer, de sik mehrst so beten wat blaag-witt wiest. Dit Schimmern warrt Adularisieren nöömt. Besünners schöön is disse Schimmer, wenn de Steen schlepen worrn is. Natürlich warrt de Phantasie vun enen Minschen dörch dit indrucksvull Schimmern anreegt. Dit Schimmern erinnert an dat Maandlicht un so hett de Steen den Naam "Maandsteen" kregen. Man dissen Namen hett de Steen eerst siet dat End vun't 18. Johrhunnert. Bet dorhen wörr he "Selenit" nöömt.


Maandsteen op rood. Klick op to'n Vergröttern!

Kraftsteen: Al bannig fröh — also in't olle Rom un in Griechenland — wörr de Maandsteen as Kraftsteen verehrt. Man hett glöövt, de Steen kunn de Maand-Energie na uns herbringen. Nöömt hett man dormals den Steen Selenit.

Segenssteen: In arabisch Länner gelt de Maandsteen as Segenssteen. He sall de Fruchtborkeit vun de Fruun fördern. Dorüm warrt de Steen dor geern in de Kleder inneiht.

Hillig Steen: In Indien warrt de Maandsteen as hillig Steen ansehen. Schöne Maandsteen warrt dor in enen Fluss anschwemmt un alle 21 Johr warrt en richtig wunnerschöön Steen anschwemmt, so warrt dor glöövt. Un denn is man dor övertüügt, dat disse Steen mit sien sülvrig maandähnlich Glasglanz dorför sorgt, dass jümmers dat nödige Lüttgeld — dat nödige Sülver — in de Tasch vun de Minschen is, de ünner den Schutz vun dissen Steen staht.


Maandsteen op blaag. Klick op to'n Vergröttern!

Monatssteen: Geern warrt en Steen enen Monat to deelt. So höört de Maandsteen — tohoop mit de Perle — to den Juni. De Maandsteen is also de Monatssteen vun de Lüüd, de in'n Juni up de Welt kamen sünd.

In Europa is man de Meen, dat de Maandsteen för uns Minschen veel Godes bringen kann, dat "Gode" aver hett nix mit Geld orrer mit Materiellet to doon.

De sanfte Maandsteen helpt den Minschen, Bangen un Nöte, de em dal dükern wüllt, to verdrieven. He helpt, dat man Levensmoot gewinnt un bewohrt. He helpt munter un froh to warrn un to blieven.
För Künstler is de Maandsteen en Hölp bi de Kreativität.


Maandsteen op geel. Klick op to'n Vergröttern!

Symbolsteen: Geern warrt Steen ok enen Planeten to ordert orrer de Sünn orrer den Maand. Natürlich höört uns Maandsteen to'n Maand — tohoop mit de Perle un den Smaragd.

Natürlich heff ik dissen mystisch Steen ok in de Böker funnen, de mien leef Mann jümmers miene "Hexenböker" nöömt. Dor steiht in, dat de Maand vör allen uns Fruun beeinflussen deit, un dor denn ganz besünners uns Föhlen. Disse Steen kann uns unse Ängste nehmen.

En Fru, de enen Maandsteen driggt, warrt dordörch en jugendlich Utstrahlen kriegen; dat Weibliche warrt ünnerstreken. De Maandsteen wirkt ok günstig up uns Vörstellungskraft.

De Maandsteen sall Menstruationsbesweer linnern können, un ok Besweer vun de Wechseljohr. De Maandsteen sall bi tonehmen Maand översteigert Erregen dämpfen.


Nanu, wat hett denn de Tabaksdoos dormit to doon?

Bi afnehmen Maand sall he hellsichtig Fähigkeiten in Gang bringen, man ok enen kloren Kopp maken un so dat Entscheiden verlichtern.

Ik sülven heff poor lütte Natur-Maandsteen, de nich slepen sünd. Se liggt in en oll Priemschachtel, de ik noch vun mienen Grootvadder Christian heff, un disse Schachtel mit den kostbor Inhalt steiht in en lütt Fack vun unsen Setzerkasten.


Ach! Dor sünd de Maandsteen in!


Maandsteen op Watte. Klick op to'n Vergröttern!


20.10.2013


na baven