Foto: A. Nissen. Klick up to'n Vergröttern!

 

Aquamarin

Vörstellt vun Anke Nissen


To'n Anhören hier klicken:

Lesen deit Anke Nissen in holsteiner Platt.

Natuur un chemisch Tosamensetten:

Berillium-Aluminiumsilikat = Al2Be4 (Si6O18) + lüttst Spuren vun Iesen orr Titan

Härte:

7,5 - 8 (Diamant hett de Härte 10)

Dichte:
2,63 - 2,80 g/ccm
Farv un Utsehn:

see-gröön bet deep-blaag Kristalle



Foto: A. Nissen. Klick up to'n Vergröttern!

Natuur un Vörkamen

De Aquamarin höört to de Edelsteengrupp vun de Berylle, dat is en Mineral, dat in vele Varietäten vörkümmt. De Farven vun 'n Beryll köönt sien: gröön, geel, blaag, rosenroot, karmesinroot, undörchsichtig orrer ganz ahn Farv. Un de blage Varietät, dat is uns Aquamarin.

De Beryll-Familie:

  • farbloser Beryll = Goshenit, kümmt selten vör
  • gröön Beryll = Smaragd
  • geelstrahlen Beryll = Goldberyll
  • geel-gröön Beryll = Heliodor
  • blaag Beryll = Aquamarin
  • rosen-rode Beryll = Morganit ok Worobjewit
  • karmesinrot Beryll = Bixbil, en Rarität, de sehr söcht warrt
  • undörchsichtig Beryll = gemeiner Beryll is nich as Edelsteen to bruken

Wenn wi enen gröön-blaag Steen seht, de "Orientalischer Aquamarin" nöömt warrt, denn hannelt sik dat üm enen Saphir, de fälschlich de Namen "Aquamarin" driggt. Jüst so warrt ok blaag Zirkon fälschlich as "Siam-Aquamarin" anbaden.

De Aquamarin bildt söss-eckig prismatisch Kristalle.

De schönsten Aquamarine — so warrt seggt — stammt ut Brasilien. En Fundort dor heet Maxaxan, dor findt man besünners deep blaag-farven Aquamarine. Se warrt "Maxaxite" nöömt.

Geschichte un Geschichten

Dat heet, dat de ollen Römer vör rund tweedusend Johr dissen schönen blagen un transparenten Steen den Naam "Aqua marina" geven hebbt. Dat is latiensch un bedüüdt "Water vun 't Meer". Se hebbt de Farv vun 'n Aquamarin mit de Farv vun't Meerwater vergleken. To Recht, so meen ik.

Un siet de Tiet is de Aquamarin ok in sien mythisch Bedüden mit dat Meer verbunnen. So is he de Steen, de to dat Steernbild "Fische" tohöört. Un dordörch is he togliek de Steen för Lüüd, de in'n März up de Welt kamen sünd. Disse Lüüd kann he veel Godes geven:

  • Na heel ollen Gloven schützt de Aquamarin vör Arglist un vör Täuschung.
  • He maakt, dat disse Lüüd Gerechtigkeit findt.
  • He gifft "siene" Lüüd Sinn för Schönheit un för Kunst.
  • He kann de Lüüd, de ünner sienen Schutz staht, alle Daag Hart un Gemüt froh maken.
  • Up Reisen soorgt de Steen för gode Fohrt un seker Trüchkamen.
  • Un he soorgt ok, dat dat Schipp vun de Ehe seker stüürt warrt un dat "sien" Lüüd an de faste Ankerkeed vun dat ehelich Truu-Sien liggt.


Foto: A. Nissen. Klick up to'n Vergröttern!

Ene Sage vertellt, dat disse schöne Steen ut de lütt Schatzkist vun de Meerjungfruun stammen deit.
In en orientalisch Märken warrt seggt, dat in fröher Tieden en Seefohrer dörch List de Meerjungfruun holpen hett, den meerwater-blagen Edelsteen to kriegen. De Seefohrer hett denn aver ut Leevde de Meerjungfruun ehre Königin entführt.

Dat warrt seggt, dat jeedeen Minsch, de dissen Steen driggt, ünner den Schutz vun de Meerjungfruun steiht. Dorüm hebbt de Seefohrers al jümmers geern enen Aquamarin bi sik. To empfehlen is, dat alle Lüüd, de en Seereis maakt, dissen Steen mitnehmt.

Un ok för de Leevde is de Aquamarin to empfehlen, graad so, as wi dat in dat Märken vun den Seefohrer un de Königin vun de Meerjungfruun höört hebbt. De Steen stüürt in 't Glück. He gellt as Symbolsteen för de Truu.

He hett also geheimnisvull Kräfte, de Aquamarin, un de kaamt besünners to 'n Wirken, wenn de Steen in 't Water leggt warrt.

Hillig Hildegard vun Bingen hett nich blots över Heil-Krüder schreven, se schreev ok över Heil-Steen, över 12 Heilsteen. Den Aquamarin un siene Heilkraft beschrifft se bi den Beryll. Se seggt em twee Wirken na:

  1. Wenn en Minsch Gift to sik nahmen hett, denn sall he beten Pulver vun den Steen afschaben, dat mit frisch Quellwaten övergeten un glieks drinken. Dissen Drunk mütt he sik fiev Daag lang maken un drinken — un denn warrt he allens Gift weder rutbringen.
    Ik mütt warnen vör dat Anwennen vun disse Heilmethode, se is würklich nich to empfehlen.
  2. De Minsch sull dissen Steen bi sik dregen — he sull em oft in de Hand nehmen un oft ankieken — denn kann de Steen Striet afwehren. He kann maken, dat een eenfach keen Lust to 'n Strieden hett.
    He kann den Minschen to Ruh bringen.
    Disse Methode empfehl ik geern, schaden kann se ja nich — un wokeen kann't weten...


Foto: A. Nissen. Klick up to'n Vergröttern!


Foto: A. Nissen. Klick up to'n Vergröttern!

Ik kann dat goot verstahn, wenn disse blage Steen na dat Meerwater sienen Namen kregen hett. Ik denk blots dor an, wenn ik — seggt wi mal in'n Maimaand — bi Sünnenschien över de Fehmarnsund-Brüüch föhr. Över mi strahlt de wiede holsteinisch Himmel, in den hier un dor mal en lütt witt Wolk rintupft is, vör mi liggt dat flache gröne Land mit de velen gelen Placken vun 'n Raps, un ünner mi liggt de Ostsee un lüücht in en wunnerfien Blaag. Dor mütt een up den Vergliek mit den Aquamarin kamen.

Ik sülm heff gor kenen Aquamarin. Man uns Dochter hebbt wi vör Johren mal poor schöne Aquamarine infaten laten. Ik denk, dat kann jeedeen verstahn, dat wi all dat Gode, dat vun dissen Steen seggt warrt, gern up uns Deern övergahn laten muchen.


19.1.2012


na baven