Dei Parker Solar-Sonde flügg nao dei Sünne

van Ludgerd Lüske


Dei historischke Mission mit dei Parker Solar-Sonde schall use Künne van dei Sünne orig verbätern. Wesselhafte Bedingungen driewet dor uteinanner un käönt dei Eern un annere Welten dropen.


Bild: NASA / Johns Hopkins APL / Ed Whitman,
Bilddaoten hier
. Klick up tau'n Vergröttern!

Dei Parker Solar-Sonde schall dör dei Atmosphäre van dei Sünne reisen, duuner an dei Baobensiete at aale Ruumfohrtüge vör ehr. Dei mutt weuste Hitte un Straohlung uthollen un läwert tauleßte an dei Menschken dei naohesten Daoten van einen Stern.

Dei Parker Solar-Sonde van dei Nasa dö man an'n 16. Juli 2018 in eine Halfschaole van dei 19,11 m hogen Verkleedung insetten, süh Bild links. So mök man den Transport van dei Astrotech Space Operationsstäe in Titusville nao den Weltruum Startkomplex 37 an dei Cape Canaveral Air Force Station praot. Dor köm dei Sonde in dei Drägerrakete van den Typ United Launch Alliance Delta IV Heavy.

Reise nao dei Sünne

Start: 12. August 2018
Startstäe: Cape Canaveral Air Force Station, Florida
Startfohrtüg: Delta IV-Heavy mit Bäöwerstufe

Bi dat Forschken in dei Sünnenatmosphäre werd dei Parker Solar-Sonde äöwer säben Johre weg bi säben Vörbiflüge dei Schworkraft van dei Venus utnützen. So kummp dei Ümloopbaohn immer duuner an dei Sünne ran. Dat Ruumfohrtüg schall dör dei Sünnenatmosphäre fleigen, 6,12 Millionen Kilometer äöwer dei Sünnen-Baobensiete. Dat is binnen van den Merkur-Ümloop un mehr at säben Maol duuner at aale Ruumfohrtüge vörher. Dei Affstand van dei Eern tau dei Sünne is rund 150 Millionen Kilometer.

Bi dei Flüge in den bütersten Deil van dei Sünnenatmosphäre (Korona) dait dei Parker Solar-Sonde eiersmaols kombinieiert Oorts-Mätdaoten un dei Bildgäwung insetten. So giff et wiss eine Revolution bi dei Künne äöwer dei Korona un äöwer dat Entstaohn un Entwickeln van den Sünnenwind. Man werd uck orig wiederkaomen bi dat Vörhersäggen van Ännerungen in den Weltruum rund üm dei Eern, dei up dat Läben un dei Technologie up dei Eern wirket.


Dei Parker Solar-Sonde kummp dör 7 Venusvörbiflüge (Swingbys) in 6,4 Johre in ein minnstet Perihel van 8,5 Sünnenradien äöwer dei Sünnen-Bäöwersiete. Dat Perihel is dei naoheste Punkt van eine Planetenbaohn üm dei Sünne. Klick up tau'n Vergröttern! Bild-Daoten: NASA, Naoteiknung L. Lüske

Extreme Forschkung

Bi dat taukaomen Dichterbikaomen raost dei Parker Solar-Sonde mit rund 700.000 km/h üm dei Sünne ümmetau. So kunn man in eine Sekunne van Philadelphia nao Washington DC fleigen (200 km dör dei Luft).

Bi dat taukaomen Dichterbikaomen an dei Sünne werd dei Vördersiete van dat Hitteschild an dei Sonde bold 1.377 °C heit wern. Dei Instrumente van dat Ruumfohrtüg werd dorbi dank den Hitteschild nich warmer at 20°C wern.

Up dei leßten drei Ümloop-Baohnen flügg dei Parker Solar-Sonde bit up 6,12 Millionen Kilometer an dei Sünnenbäöwersiete ran. Helios 2 köm 1976 blots 43,5 Millionen Kilometer an dei Sünne ran. Dei Planet Merkur kummp bit up 58 Millionen Kilometer an dei Sünne ran.

Dei Parker Solar-Sonde mutt ehr Wark för dei Wätenschkup bi eine geföhrlicke Warmte un Sünneninstraohlung maoken. Dat Ruumfohrtüg dait duune naug an dei Sünne langers fleigen. So kann et mäten, wo dei Sünnenwind dröcker werd van Unnerschall- up Äöwerschallgeschwinnigkeit. Dei flügg dorbi dör dei Geburtsstäe van dei Sünnendeilkes mit ehre üppste Energie.
Bi dit Ünnerseuken werd dei Ruumfohrtüge un ehre Instrumente vör dei Sünnenhitte wohrt dör ein 11,43 cm dicket Käöhlenstoff-Verbundschild. Dat mutt butsiet van dat Ruumfohrtüg eine Temperatur van 1.377 °C uthollen.

Dei Wätenschkup van dei Sünne

Wie Energie un Warmte dör dei Sünnenkorona wannert, wat den Sünnenwind un uck dei energetischken Sünnendeilkes dröcker maoket, will man ünnerseuken. Dei Forschkers seuket all siet 60 Johre nao disse Antworten. Aower för dit Ünnerseuken bruuket man eine Sonde, dei bi 1.377 Graod Celsius direkt dör disse Korona-Hitte fleigen kann. Vandaoge gaiht dat mit dei modernsten warmtetechnischken Fortschritte, dei disse Mission up ehre geföhrlicke Reise helpen käönt. Dei Parker Solar-Sonde hätt veier Instrumentenpakete an Bord, womit man Magnetfelder, Plasma- un Energiedeilkes ünnerseuken un den Sünnenwind at Bild dorstellen kann.


Bild, dat den Affstand van dei Parker Solar-Sonde van dei Sünne wiest.
Bild-Daoten: NASA. Klick up tau'n Vergröttern!

Tausaomewarken för den Erfolg

Dei Parker Solar-Sonde is ein Deil van dat wichtige Sünne-Eerd-Programm (LWS = Living With a Star-Programm) van dei Nasa. Dormit will man dei Aspekte van dat Sünne-Eerd-System ünnerseuken, dei direkt up dat Läben un dei Sellschkup wirket. Dat LWS-Fleigprogramm werd van dat Goddard Space Flight Center van dei Agentur in Greenbelt, Maryland för dat Nasa-Missionsdirektorat in Washington verwaltet.

Sünnenwind?

  • Dei Sünne is dei einzigste Stern, den wi duunebi studeiern käönt. Bi dat Studeiern van dissen Stern, mit den wi läwet, krieget wi mehr Künne äöwer dei Sterne in dat heele Universum.
  • Van dei Sünne kummp dat Lecht un dei Warmte för dat Läben up dei Eern. Wenn wi mehr doräöwer wätet, käönt wi bäter verstaohn, wie sick dat Läben up dei Eern entwickeln dö.
  • Dei Sünne wirket up dei Eern uck up eine minner bekannte Oort. Van ehr kummp dei Sünnenwind. Dat is ein Strom ut ioniseierte Gase van dei Sünne, dei mit Geschwinnigkeiten van mehr at 500 km pro Sekunne (!) an dei Eern vörbi suuset.
  • Störungen in den Sünnenwind lätt dat Eerd-Magnetfeld bäwern un pumpet Energie in dei Strohlenkrings. Dat is ein Deil van eine Riege van Ännerungen in den eerdnaohen Weltruum. Man kennt dat uck at Weltruumweer.
  • Weltruumweer kann dei Ümloopbaohnen van Satelliten ännern, ehre Bedriewsduur affkötten off dei Bordelektronik dörnanner bringen. Kriegt wi mehr Künne äöwer dat Weltruumweer, käönt wi dat bäter vörhersäggen. So käönt wi dei Satelliten, dei wi bruuket, bäter dorför wohren.
  • Dei Sünnenwind driff uck dör den gröttsten Deil van dat Sünnensystem un regeiert den Weltruum uck wiet an dei Eern vörbi. Wenn wi Ruumschippe un Astronauten immer wieter van tau Huuse wegschicket, mäötet wi disse Weltruum-Ümwelt verstaohn. So was dat freuher uck bi dei Seefohrt, man möß den Ozean gaut kennen.


Videos hier: Nasa
Mehr Biller hier
SO-Platt: Ludgerd Lüske


2.9.2018


na baven