Utfohrt mang de Fröhblöhers: De Pestwurz

vun Antje Heßler


Se köönt de Fotos per Klick vergröttern! Trüch kaamt Se denn mit den Zurück-Knoop op de Browser-Symboolliest.

 


De Sneekiekers maakt den Anfang

Eerste Utfohrt bi Sünnenschien

Wi harrn al de Mitt vun den Märzenmaand tofaten. Endlich weer dat wat warmer un de Sünn schien. Kort entslaten möken wi uns up den Weg. Överall an de Wegränner blöhen de Sneekieker. Sünst weer de Eer noch ahn Gröön un Blomen. Up unsen Weg föhrn wi dörch enen Wohld över en Beek. Dor lüch uns vun den Grund en groten Placken mit blassgröne Planten an.

 


Hier wasst de witten Pestwurzen


Kolonie vun Pestwurzen

Anhollen un utstiegen weer eens. Dat müss ik doch ünnersöken! "Wees vörsichtig", reep mien Mann mi achterna. De Bodden weer bannig week. Aver ik keem ganz goot bi de blassgröön Planten an. Dicht an de Beek harrn sik vele dorvun ansiedelt. Ik müss in de Hock hindaal üm se genau to bekieken. Ut de Neegde kreeg ik mit, dat de Plant den roden Pestwurz liek sehg. Den kenn ik vun to Huus.

Twee vun de hellgröön Planten heff ik afplöckt un mit na Huus nahmen. Een mit upblöhte Blöden un een mit noch slaten Blöden.


De zaarten Blöden vun de witte Pestwurz

Up unsen Nahuusweg sünd wi denn glieks an de Stell vörbiföhrt, nehm ik de rode Pestwurz wüss. De weer aver noch bannig lütt. Aver en poor vun de roden Planten heff ik doch al funnen.


An düsse unschienbore Steed wasst de roden Pestwurzen — da!


So schöön sünd se!


Rood un Witt gesellt sik geern!

To Huus heff ik de rode un de witte Pestwurz tohoop in en Glas stellt. Dat sehg recht smuck ut. Wi hebbt beide Planten miteenanner vergleken. Dat geev gor keen Fraag, de rode un de witte Plant kemen ut de glieke Familie. Nu wullen wi natüürlich mehr över düsse Plant, de Pestwurz, weten.

Pestwurz

De gewöhnlich Pestwurz is in Middel- un Süüdeuropa to Huus. Se wasst geern an't Över vun en Beek un treckt natte Bodden vör. De Stock vun de Wöttel warrt bit to veer Zentimeter dick. Al tiedig in Fröhjohr wiest se vun den Märzenmaand bit in den Mai Blödenköpp, de meist en noch slaten Hyazinth liek seht. As dicke Kolben kaamt se ut de Eer. Üm den Blödenstengel gruppeert sik lütte rötlich Blöden. Bekiekt man en eenzeln lütt Blööt, kann man enen richtigen lütten Blödenkranz wies warrn. Smuck seht se ut. Mit ehr'n Ruuch lockt se vele Insekten an. Immen, Hummeln un Bottervagel kaamt to Besöök un laat sik dat goot gahn. De witte Pestwurz ünnerscheed sik vun de rode Pestwurz blots dörch de Farv.


Dat eerste lütt Blatt

In de Blöhtiet sünd toeerst noch gor keen Bläder to sehn. Poor Daag later kaamt den de ersten noch relativ lütten Bläder to'n Vörschien. Eerst wenn de Blödenstöck verblöht sünd, wasst de Bläder rann. De warrt riesig un tellt to de gröötsten Bläder in Middeleuropa. Se warrt bit to 60 cm breet. De Form vun de Bläder seht de Huflattichbläder liek. Dat is gor keen Wunner, de Planten sünd eng miteenanner verwandt.


So üppig süht dat ut, wenn dat fertig is!


De Bottervagels weet dat ok to schätzen

De Pestwurz tellt mit to de öllsten Heelkrüder. Al in de Antike wöör se gegen Wehdaag un Krämpfe insett. In't Middelöller hett man de ätherischen Öle gegen de Pest insett: Mit den slechten Ruuch vun de Öle wull man de Pest verdrieven. (So dachen se dunntomals.)


Ok de Hummeln!

Dorna is de Heelkraft vun de Pestwurz meist vergeten woorn. Eerst as man mitkreeg, dat de Pestwurz gegen Migräne helpen kann, is se wedder bekannt woorn. Ok gegen Asthma un Heusnuppen kann man se bruken. Bi de hüüdige velen Allergien is de Pestwurz wedder to en wichtig Heelplant woorn, un wi hebbt up uns Fohrt wedder mal en ganzen Barg tolehrt.


27.3.2011


na baven