Pagels-Planten 2020

Al siet 'n Tied maakt de oostfreesche Hobbyfotograf Thomas Seemann Natuurfotos för Fotokalenner, de sien Team "Tandem"/OBW rutgifft. In de twee verleden Johr hebbt wi mit düsse Fotos en Kalenner mit Bottervagels un een mit annere Luftakrobaten in Pagels' Goorn maakt. 2020 wüllt wi en Kalenner de besünnern Planten in den Pagels-Goorn in Leer widmen. Jede Plant warrt vörstellt un to'n Sluss mit en Riemel ehrt. Hier is de Översicht över all Planten.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Juni-Plant:
Mahn

vun Thomas Seemann un Marlou Lessing


De Mahn is en tyypsche Sommerplant, un de Sommer geiht ja jümmers fröher los — de ganze Vegetaschoon is 2 bet 3 Weken vörut, vergleken mit fröher Johren. De Mahn blöht al siet Mai mit sien zaarte, fludderige, meist dörsichtige Blöden. Wenn en Gewidder dalgeiht so as hüüt, denkst du, dat köönt düsse terbreklichen Blöden gor nich överleven. Liekers steiht de Mahn neegsten Dag wedder frisch dor. Sien Blöden leevt wohraftig bloots korte Tied; avers jümmers wasst niege na.


Mahnblööt mit Falter. Klick op to'n Vergröttern!

De Mahn is heel fröh as Kultuurplant bekannt, al vör 5000 Johr hebbt de olen Ägypters ehr nütt. Dat de Plant Stoffen hett, de den Slaap föddern doot, weer fröh bekannt, un ehr Naam in ünnerscheedlich Spraken hett dormit to doon, dat een ehr eten kann. De stärkste Wirken beedt de Slaapmahn, ut den Opium wunnen warrt. Düsse Mahn-Aart dröffst in Düütschland nich ahn Genehmigen anbuun. Wenn de Slaapmahn avers wild vörkamen deit, is dat ganz in de Reeg. De heimische wille Slaapmahn hett bloots en heel swacke Wirken as Droge. Sien Samen köönt dorwegen ok bedenkenlos op dat Mahnbrötchen streit un backt warrn.


Plüüschmoors in de Mahnblööt. Klick op to'n Vergröttern!

Üm un bi 120 Mahn-Aarten sünd bekannt; bi uns seht wi Törkschen un Spaanschen Mahn, Scheinmahn, Kalifornischen un Isländschen Mahn un vele annere. Avers in de Blomenwisch un ok in't Koornfeld dröff sünnerlich de prächtige dunkelrode Klatschmahn nich fehlen. He weer de Bloom vun't Johr 2017. Wenn wi an Mohnblöden denkt, seht wi mehrst den Klatschmahn vör uns in't Sünnenlicht lüchten; un dat stimmt ok, denn de Mahn mag keen Schadden, he hett dat geern warm. Sien Blöden wiest, dat de Borrn riek an Nährstoffe is un noog Water hett. As Ackerplant kann de Klatschmahn natüürlich bloots överleven, wieldat he en eenjährig Plant is, de sik in'n Harvst nieg utseit. Dat gifft ok mehrjährig Mahn-Aarten, de wild un in Goorns leevt.


Sweevfleeg an Scheinmahn. Klick op to'n Vergröttern!

För de Insektenwelt beedt de Mahn mit sien wied apen Kelche en koles Büffet vun Extraklass. Nektar is nich dorbi, avers en heel weertvulle Pollen. Jedeen Mahnblööt hett 2,5 Millioonen Pollenkörner, de vun Immen, Hummeln un meist all anner Insekten geern nahmen warrt. Sünnerlich de Hummeln gaht al fröh an'n Dag heftig in de Blöden tokehr. Mehrst warrt so en Mahnblööt al an een warmen Vörmittag heel un deel utplünnert — wat ehr ganz recht is, dorför is se ja dor, all ehr bunte Klöör schall ja bloots de Insekten antrecken; un nameddags welkt se gau.

In dat Bild nerrn sünd en Sweevfleeg un baven op dat Blatt en lierlütte Fleeg un en mikroskoopsch lütte Spinn op den Mahn togang. In dat Bild dorünner besöcht en lütte Grill de Plant.

Een Wildimmenaart hett ehrn Naam vun den Mahn: de Mahn-Muurimm. Se bruukt vun den Mahn nich bloots sien Pollen, sünnern ok de Bläder för ehr Brood-Röhr. Düsse Imm steiht wied baven op de Rode List un warrt sachs nich mehr lang bi uns leven, wenn dat mit de industrielle Landweerschap so wiedergeiht.

tosamenföögt
afsichtslos
in'n droom
lütt aten vun blatt un blööt

verfluttert
weg
na korte tied
as de gedank in'n droom

un doch
seh ik di
— un de welt bloots
dörschienen dör dien spinnweevblatt

so deep in
dien afwesen gegenwart —
nienich warr ik
waken


13.6.2020


na baven