InSicht staiht up den Marsbodden! van Ludgerd Lüske In ein poor Stünnen bewarkte InSicht nao eine säben Maonde duuren Reise nao den Mars eine Billerbauk-Landung. Dei Sonde flög nao eine 484.773.006 km lange Reise mit eine Geschwinnigkeit van deils 10.000 km/h an dei Marsbaohn ran.
Dei NASA-Ingenieure bi dat Jet Propulsion Laboratory in Pasadena, Kalifornien, dei dat Leit äöwer der Mission haren, möken aals praot för dat Brems-Inträen van dat Ruumschipp in dei Marsatmosphäre. Nao dat Affstiegen mit einen Fallscherm un mit 12 Brems-Raketen landete InSicht an'n 26.11.2018 üm 21 Uhr (MES). "Wi häbbt bitlang den Mars ut den Ümloop studeiert un siet 1965 van den Bodden ut väl äöwer dat Weer, dei Atmosphäre, dei Geologie un dei Boddenchemie rutfunnen", sä Lori Glaze, geschäftlicke Direktor van dei Affdeilung för Planetary Science in dat NASA Science Missions-Direktorat. "Nu käönt wi eis dei Binnenlaogen van den Mars naokieken un wi krieget eine bätere Künne van den Mars-Upbau." Hier dei Phasen van dei Landung:
Vör dat Inträen van InSicht in dei Marsatmosphäre möss man noch leßte Saoken taurechte leggen. Üm 16:47 Uhr (MES) möken dei Ingenieure mit Erfolg eine leßte Fleigbaohn-Manöver-Korrektur. So kunnen sei dei Sonde blots ein poor Kilometer bisiet van den plaonten Affstiegpunkt äöwer den Mars stüern. Bold twei Stünnen vör dat Inträen in dei Atmosphäre kunn dei Mannschkup uck dat leßte Anpassen an den Algorithmus hochlaoden, dei dat Ruumschipp seker up den Bodden stüerde.
Dornao stüerde dat System dat leßte End van den Weg
sülwes. Dei Missions-Mannschkup warkede Maonde in'n Vörn
an jede Phase van dei InSicht-Landung. Dei programmeierde Anpassungen,
nao dei Weermeldungen van dei ümloopen NASA-Forschkungssonde.
Et werd noch ein poor Daoge duurn, denn kann et mit dei Wätenschkup ünner den Marsbodden losgaohn.
|
|
Originaol NASA-Artikel hier SO-Platt: Ludgerd Lüske 27.11.2018 |