Dat kloke Schaap

Vun Rudi Witzke

Eerst willt wi uns maal ümseihn, wat de Lüüd so vun't Schaap seggen:

Dat Schaap truut blots den, de em de Kehl dörchsnitt.
..ut Kurdistan

Wo een dat blöken höört, dor sünd ok Schaap in't Land.
….ut Düütschland

Pazifisten sünd as Schaap: De glöven, de Wulf weer en Vegetarier.
…vun Yves Montand

Een Schaap blökt jümmer glieks.
…ut Frankriek

In en Schaapstall kann en Kalv König ween.
...ut Düütschland

Wetenschopler unnersöökt allens:
Wat för Aavt muttst eten, dat later keen Falten kriggst? Woveel Water müßt an'n Dag drinken? Woveel Water puust du in de Slaapkamer ut in een Nacht? Woveel Bakterien sitten up dien Kusen, wenn een Sahnebonsche eten hest? Woans süht dat achtern up'n Uranus ut?
Dat gifft nix, wat se nich meten, tweisnieden, langtrecken, upkaken un wat weit ik mit anstellt.

Nu hebbt sik welk an de Arbeid maakt un üm de dummen Schaap bekümmert. Se knipsten Schaap un hüngen Purtretts in'n Stall vör de Schaap up. Wat passeert nu? In uns un ok in de Schaap gifft dat en besünnern Saft, de uns un de Schaap in lieke Wies so ornlich in Raasch bringt. De heit Adrenalin.
Wenn de Schaap nu dat Purtrett vun en goden Maten seihn, geiht de Adrenalin-Speigel daal. Dat Hart sleit nich mehr so rasch. Se stahn kommodig tosamen.

Na, un denn hebbt de kloken Forscher de Schaap afstrakte Biller henhungen, so welk mit Zacken un ornlich Farven dörcheenanner. Wat nu? De Harten vun de Schaap füngen an to rasen. 113 maal slöög so en arm Schaapshart in de Minuut. Un denn rönnten se dörcheenanner, sprüngen över eenanner un blökten luuthals. Un dat nu allens nich ut Freud. Orrer?
Wat dat nu to bedüden hett, dat willn de Wetenschopler up een Welt-Tosamenkumst, den groten Schaaps-Kongreß in Tokio, beraden.

Rudi Witzke

P.S.: Nich verraden: Wi hebbt mien Purtrett in en Schaapbucht hangt. Dreemaal dörffst raden, wat de Schaap makt hebbt.