Dei ESA-JUICE-Mission — 2023

van Ludgerd Lüske

JUICE (Jupiter Icy Moons Explorer; äöwersettet: Jupiter-Iesmaonde-Kundschafter) is eine ESA-Jupitersonde, dei dei ESA an’n 14.April 2023 starten dö. Dei schall dei Galileischken Maonde Ganymed, Europa un Kallisto van den Planet Jupiter ünnerseuken.

JUICE-Sonde vör Jupiter, Projektbild. Bild-Daoten: Wikipedia

JUICE is eine komplexe Mission, dei schall dat Jupiter-System un besünners den Jupitermaond Ganymed nau ünnerseuken. Dat schall uck neiet Wäten äöwer dei Jupitermaonde Europa un Kallisto bringen.

Et schall ünnersöcht wern, off up disse Maonde Läben vörkaomen kann un off dorup Lebenniget waohnen kann. Dei Mission ünnersöch dei Atmosphäre un dat Magnetfeld van Jupiter, un up wecke Wiese dat mit dei Jupiter-Maonde wesselwarket. Ünnersöcht werd dei Dickte van dei Ieskossen up Europa, baobenschkup söch man nao Lande-Stäen för tauken Missionen. Up Ganymed schall dei Iesbodden, aower uck dei Laoge-Dickte un dei Maond-Binnenupbau mit den unner dat Ies liggen Ozean ünnersöcht wern.

Ganymed is tautied dei einzigste Maond in dat Sünnensystem, wovan man ein Magnetfeld kennt. Bi disse Mission schall dit Magnetfeld ünnersöcht wern. JUICE hätt Instrumente taun Ünnerseuken van dei Iesdeilkes, dei Europa utstöten dait, un noch mehr Instrumente taun Ünnerseuken van dei Exosphäre van dei Jupiter-Maonde.

Jupitermaond Ganymed, upnaohmen van dei Ruumsonde JUNO
an‘n 07. Juni 2021. Bild-Daoten: Wikipedia

Ganymed is dei darde un gröttste van dei veier Galilieischken Maonde van den Gasplanet Jupiter. Hei is mit einen Dörmäter van 5262 km dei gröttste Maond in use Sünnen-System.
Ganymed hört tau den Iesmaond-Typ un hätt einen Karn ut Iesen. Hei hätt eine orig dünne Atmosphäre un is dei einzigste Trabant mit ein starket Magnetfeld.

Europa, upnaohmen mit einen Affstand van 677.000 km van dei Ruumsonde Galileo
an‘n 07. September 1996. Bild-Daoten: Wikipedia

Europa is dei tweitbinnste Maond van Jupiter. Hei is mit einen Dörmäter van 3121 km dei lüttkeste van dei veier grooten Jupiter-Maonde un dei seßgröttste Maond in use Sünnen-System.
Europa is ein Ies-Maond. Dei Temperatur up den Europa-Bodden ligg bi -130°C. Dör dat Mäten van dat bütste Gravitationsfeld un den Naowies van ein anregtet Magnetfeld rund üm Europa dör dei Galileo-Sonde, kann man annähmen, dat ünner dei kilometerdicke Waoter-Ies-Laoge ein Ozean ut fleiten Waoter ligg, bold 100 km deip.

Kallisto, upnaohmen in‘n Mai 2001 van Galileo. Et is dat einzigste vulle globaole Farwbild, dat disse Sonde knipsen dö, dei siet 1995 üm den Jupiter rund flügg. Bild-Daoten: Wikipedia

• Kallisto is dei veierde Maond van Jupiter. Hei is dei tweitgröttste van dei veier Jupiter-Maonde, un hei is mit einen Dörmäter van 4820 km dei dardgröttste Maond van use Sünnen-System, blots ein bäten lüttker at dei Planet Merkur, dei aower väl mehr Masse hätt.
• Kallisto hört tau den Ies-Maond-Typ. Hei is dat Objekt mit dei meisten Kraoters in dat Sünnen-System.
• Kallisto is dei bütste van dei veier Ies-Maonde, dei aale so lecht sünd, dat man dei all mit ein Fernglas seihn kann.
• Hei is 5-maol so wiet van Jupiter aff at dei Erdmaond van dei Ern. Dör dei weuste Planet-Masse hätt hei blots einen Ümloop van 16 Daoge.

JUICE hätt bold eine Knobel-Form un is drei-assen-stabil un hätt Reaktionsröre. Dei Sonde hätt eine Masse van bold 2420 kg, dorvan sünd bold 280 kg Nüttlasten. Bi den Start wörn in dei Tanks 3650 kg Driewstoffe. Mit dei introcken Anbauten meet dei Sonde 4,09 x 2,86 x 4,35 m.

JUICE bruukt as Dreiwstoff MMH un den Oxydaotor MON. Dat Hauptdriew-Wark kann mit 425 N schuuwen un werd bi dat Inschwenken in den Jupiter-Ümloop un för dei Vörbifleig-Aktionen un uck noch för dei lüttken Stüer-Düsen bruukt.

ESA-Weltruum-Mision JUICE, Projektbild. Bild-Daoten: Wikipedia

An’n 14. April 2023 üm 14.14 Uhr (MESZ) steeg dei Rakete mit dei Sonde up van dei Startrampe ELA-3 van dat Ruumfohrt-Zentrum Guayana. Juice güng dorbi in einen Sünnen-Ümloop. Juice is dei leßte Wätenschkup-Mission, dei mit eine Ariane-5-ECA-Rakete van dat Ruumfohrt-Zentrum Guayana starten dö. Dei Ruumsonde wög mit dei Driewstoffe un Instrumente bold 6350 Kilogramm. Ehre Flucht-Geschwinnigkeit up dei Affleit-Baohn in den Weltruum schall bi 3,15 km/s liggen.

An den 26. Mai 2023 köm dei Naoricht, dat mit dei beiden Selfiekameras nao seß Wäken aale utfeuherten Deile, Solarpanelen, Antennen, Armse, Sensoren un Instrumente in ehre Endlaoge inrastet un för Tests praot sünd. Dei 16 Meter lange RIME-Antenne kunn man eiers nich vull utfeuhern, aower tauleßte güng et doch. Dei optischke Kamera JANUS mök dei eiersten Biller. Midde Juli 2023 dö man aale Instrumente up ehre passen Funktion testen.

Acht Johre lang schall dei Flug duuren. JUICE schall bi ehre Sünnen-Ümloop-Aktionen ein poor Swing-by-Baohnen an dei Ern langers fleigen. Uck Manöwers an den Maond un an dei Venus kaomt dortau. In’n August 2024 schall et ein gröttert Fly-By-Manöwer an Maond un Ern gäben.

In’n Juli 2031 schall dei Sonde bi Jupiter ankaomen. Bold ein halwet Johr vörher schall dei Wätenschup-Bedriew los gaohn.

JUICE-Instrumente. Bild-Daoten: Wikipedia

Verkloren:

• Exosphäre: Dat is dei fleiten Äöwergang nao den interplanetoren Ruum.
• Reaktionsrad: Ein Reaktionsrad is ein Apparaot för dat Regeln van dei Satelliten-Laoge. Et bestaiht meist ut einen Motor un eine dorvan andräben Schwungmasse. Dortau kummp noch dei Stüer-Elektronik för dei Motor-Dreihtaohl.
• MMH-Driewstoff = Monomethylhydrazin

Reaktionsröre in Tetraeder-Utrichtung. Bild-Daoten: Wikipedia

Dei Utdruck Mixed Oxides of Nitrogen (MON) bedütt „Mischkete Stickstoffoxide“. Dat sünd Lösungen van Stickstoffmonoxid (NO) in Distickstofftetroxid / Stickstoffdioxid (N2O4 / NO2). Sei käönt at Oxidator in Raketen-Driew-Warke bruukt wern.

Dat RIME-Instrument is ein iesdörstraohlen Radar, dat den Bodden un dei Unnergrund-Struktur van dei Jupiter-Ies-Maonde bit in eine Deipte van 9 km ünnerseuken schall.

Wortverkloren:
Knobel = Würfel
baobenschkup = außerdem

Originaol-Daotei: Wikipedia