De Halligstork (Austernfischer)

vun Antje Heßler


De Biller köönt Se per Klick vergröttern!

An de Küst weiht sieht Dagen vun Meddag an en stiefen Nordoost. Över Dag is dat bannig warm, dat is Familie HalligstorkHochsommer. Dorüm gah ik eerst na't Avendbroot noch mal an't Water. Dor sünd vele Watervagels, de sik dor ehr Freten söökt. Mit den Nordoost warrt Seegras un Tang an Land spöölt. Dor sünd so allerhand Miesmuscheln un anner lütt Gedier bin. De Aanten, Lach-, Sturm- un Raubmöwen wöhlt dat Seegras dörch un dörch. Dor gifft dat bannig veel Larm un Striet twischen de Watervagels.

Siet eenige Tiet sünd ok Austernfischer dorbi. Schriegen harr ik se al öfter höört — binah as "kiwiev!" klingt dat, un se schriegen bannig flietig —, un nu heff ik se ok sehn. Wat heff ik mi freut! Ik mag den Halligstork to geern lieden. He is in't Watt an de Nordsee to Huus. Dor warrt de Austernfischer wegen sien langen roden Been "Halligstork" nöömt.

Bi uns an de Oostsee dröppt man den Austernfischer eher selten an. De hier weer aver al so frech, as wenn he hier to Huus weer. Wenn he Miesmuscheln in sien Snavel harr un de Möven wullen em de afjagen, glööv man jo nich, dat he dat toleet. He fladder mit de Flünken un verjaag mit luut Schriegen de Möwen. Un de hau'n wohrhaftig ok af.

Mudder un Küken. Dat Küken hett griese BeenDe Miesmuscheln bröch de Halligstork denn na sien Küken. Dat weer al flügge, seet aver in'n Sand un tööv up Foder. Dat Küken hett noch keene roden Been un ok de Snavel is noch körter un gries. Normaal bröödt Herr un Fru Halligstork, beed tohoop, in knapp veer Weken so üm 3 Eier ut, un dat ok bloots een Maal in't Johr. Avers mennig Jungvagels kaamt üm. Villicht weer düt Küken de Rest vun en gröttere Bruut. Is to höpen, dat dat rund un dick warrt un dörkümmt!

Düt Küken hett ok bloots en griesen Snavel un griese Been, avers dat schaneert sik un mag dat nich wiesen

To goder letzt sett sik de Halligstork doch merrn up enen Strandkorf, so as wull he seggen: "Hier bün ik to Huus". Dat heet, dat he am leevsten an den glieken Oort blifft. Twoors is he eentlich en Toogvagel, aver mennig Halligstorken blievt al dat ganze Johr hier.

 

 

Ok in de Leevde is de Halligstork bestännig: Herr un Fru Halligstork sünd sik levenslang tru. De Halligstork kann, wenn em dat good geiht, över 40 Johr oolt warrn. — Wüllt wi höpen, dat de Halligstork ok in Tokumst bi uns blifft!



na baven