 |
Bottervageljohr 2018 In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers. Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest. Bottervagel vun'n Oktobermaand: vun Thomas Seemann un Marlou Lessing Bläulinge sünd en ganze Familie vun relativ lütte Falters, de mehr orr minner blaag sünd — un faken ok bloots de Keerls. Klingt na Minschen? Sünd avers Bottervagels, un heel schöne!
Dat gifft Bläulinge praktisch överall in de Welt. In Europa schallt alleen 140 Ünneraarten vun Bläulinge vörkamen, knapp 50 dorvun in Düütschland; weltwied sünd dat 5000!
Dat Woort "vörkamen" is en beten verkehrt, denn faken kaamt se even nich mehr vör. In Middeleuropa gellt wohraftig all Aarten meddewiel as bedrauht. Dat hett mit ehrn Levensruum un Levenswannel to doon. Bläulinge sünd Spezialisten, mennig Ünneraarten bewahnt bloots heel smalle ökoloogsche Nischen — ganz spezielle Levensrüüm orr Foderplanten för de Rupen. In Krisentieden kaamt düsse Wesen as Eerst ünner Druck. So hett de hitte Sommer 2018 de Bläulinge besünners hart drapen. De Hauhechel-Bläuling hier in uns Fotos is noch an'n besten wegkamen, wieldat he relativ flexibel leven kann. Een to finnen is avers nich mehr licht.
Sünnerlich kurioos sünd de Rupen vun'n Bläuling. Dree Veerdel vun de Bläulingsaarten weltwied hebbt Rupen, de mit Mieren (Ameisen) tosamenleevt un sik sogor dör ehren Ruuch as Mieren utgeevt, dat se in den Mierenbu as Mier leven köönt. Se laat sik denn entweder vun de Mieren fodern — orr se freet ganz eenfach de ehr Larven. Teemlich undankbor, avers wohr. In so'n Mierenbu kaamt se ok good över kole Winter. Bläulinge överleevt den Winter bi uns nämlich nich as Falter; bloots Rupen orr Eier överwintert. Se mööt sik denn ja noch verpuppen un sluppen. Relativ laat in't Johr fleegt denn de Falters — welk so in'n Mai, anner kaamt eerst in'n Juni/Juli vörtüüg. Ünnerscheedlich bi de Bläulinge is dennnso ok, wo veel Generaschoonen se in een Sommer produzeern köönt: de fröhen Aarten schafft twee Generaschonen, de laatern man bloots een. Uns' Hauhechel-Bläuling hier is een vun de fröhern Flegers un schafft twee Generaschoonen, in ganz milde Gegenden sogor dree. He flüggt bet in'n Harvst.
Överwintern deit de Hauhechel-Bläuling as Ruup. De Rupen vun'n Hauhechel-Bläuling sünd ganz solide, se höört nich to de, de sik vun Mieren fodern laat. Se leevt vun Planten, sünnerlich vun ünnerscheedlich Klee-Aarten (dor leggt de Falter ok sien Eier af) un vun de Hauhechel (ach wat!). De Falter suugt geern an Disteln, Dost un poor annere Planten.
Hett de Bläuling en Schangs? Dat kümmt op an. Wenn in de industrielle Landweerschap alltied de Wischen ahn Rüchsicht op Wildplantenblööt afmeiht warrt, süht dat wiederhen slecht ut. De Bestänn an all Bläulinge gaht torüch. Helpen köönt bloots en passlich Angebott an Levensrüüm un Foderplanten to rechte Tied, Blöhstriepen an Knicks, Wischen un Äcker un op't best en konsequent ökoloogsche Landweerschap.
Lütt Stück Himmel Finnst du nich rut 4.10.2018
|
De
Fotos hier wiest dat Heken vun den Hauhechel-Bläuling. He höllt,
wat sien Naam versprickt. Dat gifft avers ok Bläulinge, de
bruun, vigelett orr sogor orange-rood sünd, welk ok mit schillern
Flünkendecken. Ok dat Wiefken vun den Hauhechel-Bläuling
hett brune Flünken. (Se is rorer to sehn as dat Heken un much
sik ok hier nich wiesen.) De Aarten ünnerscheden kannst op't
best an de Flünkenünnersiet: Das Pünkt- un Fleckenmuster
dor is ganz typisch för de enkelten Bläulingsaarten.
