En Austernfischer in Hamborg

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Hüüt Namiddag weer ik in Hamborg-Horn ünnerwegens. Miteens sehg ik op de Wisch en swatten Vagel, mit 'n witten Buuk, rosarode Been un en bannig langen rooten Snavel.

Na sowat, en Austernfischer meern in'ne Stadt!

De Wattenvagel levt egentlich an de Küst, to'n Biespeel an de Noordsee.

Ieverig gung he över de Wisch un weer an't rumpicken. Denn jumpt he op de lüttje Muur un rop op de Straat.

Op de annere Siet keem denn de Nachwuchs achter en Auto vör un kreeg dat to eten, wat de Austernfischer op de Wisch oppickt harr. Leider sünd de beiden denn so gau afneit, dat ik den lütten Piepmatz nich mehr fotografeern kunn.

In dat Book "Was singt denn da" vun Ulrich Schmid in'n Kosmos-Verlag heff ik leest, dat de Austernfischer erst mit 3 Johren sülmst brüten deiht. Ehrn Partner blifft se meist dat ganze Leben lang tru, un dat kann över 30 Johren duurn!

Dat schüllt de Minschen eerst mal namaken.