Vun Harvst na Winter

Biller vun Thomas Seemann, Wöör vun Marlou Lessing

November

Klick op to'n Vergröttern!

de lüttje pogg kiekt di an —
ik weet, seggt he, wenn de tied kümmt
de kole tied
un dat ies sik över di slütt —

man dat gifft en steed
heel deep in'n diek
'neem dat ies nich henkümmt
un du leven kannst
fungen
vun't ies
avers nich besiegt

jaaaa, seggt de lüttje pogg,
hest ja recht, dat gifft keen frieheit ünner't ies
dat gifft keen seerosenblatt un keen avendsünn
avers leven,
leven gifft't ünner't ies.

Dezember

Lüchttoorn Rotersand. Klick op to'n Vergröttern!

de stellung hollen
as levensopgaav

in blaag
un küll
in storm
un dunkel

de stellung holln
as egen-sinn
un denn

lüchen, lüchen
un all anner wiesen
wo dat geiht:

de stellung holln.