Edvard Munch: Dei Schrie — wo was dat maolt?

van Bob Egan



Lithografie "Dei Schrie" vun Edvard Munch, koloriert van Ludgerd Lüske.
Klick up tau'n Vergröttern!

Dei Schrie

Streng un faste treckt dei Straoten,
dat Himmelsfür is nich tau faoten.
Achtern sägelt Schippe vör dat Land,
nargens kummp 'ne helpen Hand.
Dei Blick strick äöwer’n Fjord hendaol,
Stadt un Karktorn drömet faohl.
Frönde sachte wieder gaoht,
market nich maol den Verdraot.
Not driff herut den luuten Schrie;
güng doch dat Leipe gau vörbie.

Ludgerd Lüske 2015


Dei Schrie. Lithograophie van 1895. Klick up tau'n Vergröttern!

Dei Schrie is ein't van dei an best bekannten Bildwarke up dei Welt. Et wieset einen Mann in einen Oogenblick mit Piene, Twiewel un Bange, wobi dei annern Lüe up dat Bild, vellicht siene Frönde, schiens nich väl van den Mann siene leipe Laoge market. Dei norwägschke Maoler Edward Munch (1836-1944) maolde verschiedene Versionen van den Schrie, un ein affännertet Bild för sick sülwes (mehr dortau kummp läöter), in Ölge, Pastel un as Lithograophie tüschken 1893 un 1910. Disse, miene leiwste Version, wieset mit den starken Kontrast van dei schwart-witten Linien den Gägensatz tüschken dei Not van den Mann un dei ruhige Landschkup ümmetau.

Dei Ansicht van dit Bild wieset eine Utsichtstä an dei Siete van dei Straoten Valhallveien up einen lüttken Barg äöwer Oslo in Norwägen. Disse Ekeberg-Barg ligg duune an'n Süden van dei Stadt Oslo. Dei kurvige Straoten löpp nao einen Park baoben up den Barg. Van dorut bekieket sick dei Lüe gerne dei Stadt. Hier dön dei Künstlers van Oslo uck faoken ehre Biller maolen.
Wo schull man dit nu neumen? Eine Geisterjagd!

Dei Weg nao disse Stä

Ick was wiss nich dei eierste hier — dei Norwägers kennt disse Stä — man dei Lüe annerswo wätet doräöwer schiens nich so recht Bescheid.

Eiers maol wat ut dei Achterhand: Dei Wikipedia-Indrag för "Dei Schrie" beschriff orig gaut dat, wat ick uck äöwer Munch siene Gedanken läsen dö:

Dei originaole dütschke Titel, den Munch dat Wark geef, was Der Schrei der Natur. Dat norwägschke Wort Skrik werd meist up Englisch as scream äöwersettet aower et is dat süfftige as dat englischke shriek. Mangers heit dat Bild uck The Cry. Up eine Siete in sien Daogebauk mit dei Äöwerschrift: Nice 22.01.1892, beschriff Munch siene Gedanken tau dit Bild:
"Ick güng up einen Padd mit twei Frönde — dei Sünne güng unner — upmaol wörd dei Himmel blautrot — ick bleef staohn, feuhlde mi schwack, un ick lähnde mi äöwer dat Gelind — dor wörn Blaut- un Fürtungens äöwer den schwart-blawen Fjord un dei Stadt — miene Frönde güngen wieder, un ick stünd dor mit Bange an't Bäwern — un ick feuhlde einen endlosen Schrie, dei dör dei heele Natur güng."


Dei Schrie — 1893, Tempera up Pappe (Norwägschke Nationaolgalerie Oslo)

Wenn ick up dat Bild Dei Schrie kieke, meen ick alltied, dat dei Mann mit den Schrie an ein langet Gelind off an dei Siete van eine langen Brüggen stünd. Beide Ansichten häbbet wat tau daun mit Waoter. Vellicht kummp dat van ein grootet Waoter achter üm, wor Mastenschippe sägelt.


Dei Schrie. Lithograophie van 1895. Klick up tau'n Vergröttern!

So dachde ick eiers an eine Küstenstadt off an einen See in Norwägen, wobi dei Sägelboote orig groot utsehgen.

Et giff noch annere Ansichten tau den Oort: Achtertau markden dei beiden Lüe mit Haut schiens nix van dei Laoge. In den Achtergrund süht man uck einen spitzen Torn van ein grootet Bauwark, so as bi eine Karken, un rechterhand ein poor wellige Linien as Henwies up annere Hüser.


So söchde ick mit Google nao: Munch, dei Schrie, Stä. Man tau dat up eine Straoten bi Oslo schreef woll nümms einer wat äöwer dei naue Stä.

Don söchde ick nauer in Google-Books nao Munch un Dei Schrie. Tauleßte fünd ick ein Bauk, dat beschreef, dat Munch sien Bild up eine upstiegen Straoten nao den Ekeberg-Barg bi Oslo maolde. (Dat Bauk heet: "The Private Life of a Masterpiece" van Monica Bohn-Duchen.)

Dat was nu gaut naug. So bekeek ick mit Google-Maps Oslo. Taueierste sehg ick, dat Oslo woll eine Binnenland-Stadt was, wobie ick markde, dat dat Waoter up dat Bild doch mehr so utsehg as bi einen See. In Ordnung, dachde ick, denn is dat woll ein See.

Bi dat Inzoomen sehg ick, dat dei Stadt wohrhaft an't Waoter leeg. Dat, wat so utsehg as dei See in Dei Schrie, was aower ein Deil van einen Fjord. Dei wörd beschräben as eine lange, schmale lüttke Bucht tüschken steile Felsen.


Werd noch grötter zoomt, denn süht man bi Oslo Waoter-Buchten. So kunn ick läöter rutfinnen, wo dei beiden Buchten up dat Bild wörn.
Ick kunn uck Ekeberg an dei Südsiete van Oslo seihn, wor dat Bild maolt wörd.


Ick fünd dei Stä van dei Osloer Kathedraole mit Google-StreetView. Aower rechterhand fünd ick süß kiene hoogen Bauwarke, dei vellicht mit dei welligen Linien in dat Bild Dei Schrie wat tau daun harrn.

Schullen vellicht dei verdreihten Linien dat Groote Bauwark lünkerhand van dei Kathedraole den Königspalast wiesen?

Freuher heet Oslo uck Kristiana (süh up dei Postkorte).


Histoorsche Postkoort


Dei Kupperplaot

Bi dit Seuken kreeg ick äöwer ein upspringen Foto eine Kupperplaoten mit dat Schrie-Motiv tau seihn. Dat stünd in einen Bericht mit Fotos van einen Barg ut, worup man Oslo neern sehg. Nu füllt mi up, dat disse Stä vellicht wat mit den Barg in Ekeberg tau daun harr. Wat wi all wätet: Schrie heit up norwägischk Skriek.

Ick güng up dat Foto eine Straoten langers nao einen Fjord bi Oslo. Dor was ein Gelind, dat bold so utsehg as dat up dat Schrie-Bild. Nu wüß ick, dat ick kort vör dei Lösung stünd, dei Saoken passden all orig gaut binanner.

Ich wüß nu, dat in dat Bild dei twei Waoterbuchten lünkerhand leegen un dat dei Kathdraole rechterhand liggen möß. Ick zoomde up den Ekerberg-Barg tau un ick wull seihn, off Munch vellicht hier stünd un disse Szene maolde, mit eine Utsicht van Nordwesten up Oslo.

Up dei Bargsiete, duune bi Oslo, was eine kurvige Straoten. So söchde ick mi einen Straotenend duune an Oslo ut un trück dat orange Street View Männken up dei Straoten daol.
Un eine Ansicht grötter...

Landen dö ick up eine Autostraoten mit eine Oslo-Ansicht achtertau. Lünkerhand van dei Stadt kunn ick twei Waoterbuchten seihn, dei man mit dei Buchten in dat maolte Bild verglieken kunn. "Wunnerbor, et is doch kien Binnensee. Et is eine Bucht!", sä ick tau mi sülwes. In dei Bildmidde kunn ick bi ein dägdet Bildvergröttern dei Kathedraolenspitze seihn. Nu bün ick pass ankaomen.

Dei süftige Ansicht, vergröttert un mit mehr Kontrast:

Besünners in disse Ansicht was ein Metallgelind an den Fautweg. Et löt orig so as dat höltern utseihn Gelind besiet van den Fjord up dat olde Foto (s. nerrn). Ick harr immer dacht, et was dei Siete van eine Pier. Dei Metallbänder sünd woll dei moderne Ersatz för dat Holtgelind.

Nu güng ick mit Street View nao eine annere Stä up dei Autostraoten. So kunn ick dei Stadt van einen anneren Winkel ut bekieken. Un worhaft, ick fünd dorbi dei Ansicht van dei Skriek-Plaoten.

Dei seet an eine lüttke Betonmürn, dei an dei Straoten stünd. Nu was ick mi wiss, dat was dei Stä, wo dat Bild maokt wörd. Nu harr ick einen offiziellen norwägschken Popspot funnen.

Noch maol tau'n Besinnen: hier is dei Stä up dei Bargstraoten mit einen Wies-Piel up den Vöroort van Oslo.

Van hier süht man dei Ansicht achter den Schrie-Mann up dat Bild.
Ick wies dat up twei Wege: Up den eiersten kann man lichter dei Buchten in den Achtergrund seihn. Dat Bild is nich so nau, dat man dei Kathedraole süht, aower dei Stä is pass.

Un dat tweide Äöwerleggfoto wiest wohrhaft: "Dit is dei Stä", et is ein Popspot. Süh an!

Tau dit neumte Bild Dei Schrie hätt dei Maoler noch eine Riege Biller maoket tau dat Themao "Läben mit Bange". Dat was an disse Stä mit eine ähnlicke Ansicht up Oslo, in dei Johre tüschken 1893 un 1910.
Tausaome mit dei annern Versionen van Dei Schrie hörden dei tau dei Riege Dei Läbensfries. Hier kaomt wekke ut disse Riege, pass tau dei Tied settet (vellicht nich aale). Quellen hier.


Dei Schrie — 1893, Tempera up Pappe (Norwägschke Nationaolgalerie Oslo)


Vertwieweln — Ölge up Linnenwand, 1894


Vertwieweln — uck 1894


Bange — Ölge up Linnenwand, 1894


Dei Schrie — Lithograophie, 1895


Dei Schrie — Lithograophie, mit Farwen, 1895
Munch-Museum in Oslo


Dei Schrie — Ölge up Linnenwand, 1895 — Et giff blots disse eine Version, wo ein Mann achtern sich äöwer dat Gelind böget. Et hörde den Hannelsmann Petter Olsen, den sien Vaoder was ein Frönd van Munch. An'n 2. Mai 2012 wörd et up eine Auktion verköfft.


Bange — Holtschnä van 1896


Bange — Lithograophie van 1896


Dei Schrie — Mischktechnik, direkt up Pappe, 1910,
Munch-Museum, Norwägen

Dei Schrie wörd nich up eine Brüggen maolt, aower Munch maolde wekke Biller up Brüggens, dei hei tau'n Bispill so neumde: "Dei Deerns up dei Brüggen", 1901. Dor kannst seihn, dat siene Straotengelinds so laotet as dei an siene Brüggens.


Deerns up dei Brüggen, Nationalgalerie, Oslo

As Munch 1944 störw, verarwde hei bold sien heelet Wark an dei Stadt Oslo. Dorför bawde dei dat Munch Museum. Tau'n wiederstudeiern kiekt Sei dor up ehre Internetsiete. Dei Nationaolgalerie van Norwägen, wieset up ehre Internetsiete uck Munchbiller.


Sülwsportrait mit Armskelett

Munch hörde tau dei Kunstbewägung van dei Expressionisten, dei sick as Antwort up dei ruhigere Welt van dei Impressionisten gründen dö.
Hier süht man Munch up ein Sülwsportrait van 1895. Hei süht würklick'n bäten so ut as dei Menschk in den Schrie.

Dit Sülwsportrait heit Sülwsportrait mit Armskelett un dor ligg ein Armskelett neern in't Bild. In einen Kommentor van dat Britischke Museum staiht: "Dei Knaokens wieset up den Dood".

Äöwer den Schrie wörden duusende van Bildparodien maoket mit inmaolte Comicfiguren un so wieder.
Dat Filmposter för Home Alone harr schiens as Vörlaoge uck den Schrie. Un et schinnt so, dat man uck dei Maske in dei Filmserie The Scream nao Munch siene Vörlaoge maoken dö.
Wenn man mit Google-Biller nao The Scream Parody seuken dait, denn finnt man ein poor hunnert Parodie-Biller.

Un ick verlaot Jau nu mit miene Dochter Alice un ehr Halloween-Naospill van The Scream. Sei denket woll: "O Gott, ick kann't nich glöben, hei will wohrhaft dit Bild nähmen!" AAAaaaaaaa!


Bob Egan's Website
Dei Schrie up Bob Egan's Website
Südollnborger Platt: Ludgerd Lüske
15.2.2015

trüch


na baven


na't Flack

na de Startsiet