Notizen ut'n Harvstmaand 2007. Biller un Texte

Notizen ut'n Harvstmaand
"züblin tiefbau" na blagen heven ut de eerd sühst geel de silos scheten. "tiefbau" nöömt's sik, dat is verkehrt: denn "tiefblau" mutt dat heten.

	pappelsamen de tokumst vun en lütt pappel fallt di in'n schoot: all ehr wesen in din hannen fulln mit banges tovertruun — dat grote Kann, dat grote Villicht dat grote Höpen — millioonenfach flüggt't in'n wind söcht hüsung söcht en stee, de wassen lett en hann, de pappeln planten will op höpen utseit ok ik un du millioonenfach dalfulln op en stee, de wassen lett...? licht in min schoot liggt banges tovertruun puckern pappelhart fraagt: büst du hüsung? pappel ik, pappel du.

loof, to'n dalfalln bestimmt — himmel, sporsam mit licht — schicht vun smödiges nimmt metzensnied vun't gesicht — knaken ünner de huut. dünn is se, man entspannt. loof fallt dal sünner luut. süh, dat wiest di dat land.
Fotos un Texte: Marlou Lessing mehr dorvun: hier Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop. Marlou Lessing