Notizen ut'n Saatmaand


warrt tied, di röppt de klockenslag,
nu söch de himmelsstraat!
du dröömst ja al vun, nacht un dag,
du söchst de richt un kiekst dorna,
'neem süss keen straten gaht.

 

 

 

 

 

de himmelsstraat! neem föhrt se hen?
wa wied muchst mit ehr gahn?
is't licht orr düüster da an't enn?
un is't dat enn? wat sühst du denn?
röögt noch din twieveln an?

 

hooch löppt se langs, kehrt sik nich an
wat nerrn een mit ehr geiht.
se stüürt na'n heven, lett di stahn,
ok heven nimmt di nich bi hann,
gifft bloots sik sülvst geleit.

 

 

 

 

 

 

 

du stoppst an't schild. nu is dat klaar.
vun hier af gellt verbot.
de himmelsstraat sweevt wunnerbaar
ahn regung dör't terfallen jahr,
so licht, so hooch, so groot.
du kiekst ehr na, din sinn warrt klaar:

ankamen deit nich noot.


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet