Notizen ut'n Märzmaand


folg den wind un folg de koh
op den weg na't fröhjohr to!
nimm de richt, kiek na ehr hörn,
an de kimm de fröhjohrssteern
dämmert op un röppt di to:
folg den wind un folg de koh!

folg den wind un folg dat deert!
mark op dat, wat se di lehrt:
stüttig ween kann jedereen,
swatt orr witt, ok op dree been!
an kümmt, de sik nich verfehrt.
folg den wind un folg dat deert!

folg den wind un folg dat veeh!
is de lent ok lang passé,
treckt se wieder, schridd üm schridd.
fraag du nich un gah du mit!
anner telen streevt se to.
folg de grote, swatte koh!


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing

4.10.2019

trüch


na baven


na't Flack

na de Startsiet