Notizen ut'n Christmaand


Warme Wiehnachten 2015 in Hamborg

Wat spegelt warrt, süht bloots sik sülvst.
Man binnen randvull mit Geschenken
raast wat vörbi. Dat Spegelbild
steiht still. An Disch un Bänken
sitt buten Lü, ok noch bi Nacht
un klöönt un eet un drinkt un lacht
un klöönt un lacht un drinkt un eet.
De ganze Stadt is en Buffet.

De Wiehnachtsmärkte slaat den Bagen
üm Hart un Seel un Geld un Kniep.

Den Kopp hebbt s' em hier rünnerslagen.
Wat will de hier denn ok, de Typ?!

De lerrig Maske hangt noch dor —
und droben singt jubelnd der Engelein Chor.

Warrt't beter, wenn'k op't Land rutkaam?
Poor Daag na Wiehnacht liggt dor al
de doden Bööm. Smiet weg den Kraam!
Noch vör Silvester! Ratzekahl
hebbt s' Woolden slaan — för de poor Daag.
Nehmt Plastik staats de Kedensaag!!!

Bloots feern in Still ehr Hilligdom,
'neem nüms na fraagt, dor foormt de Strunk
mit Dreekant-Wulk — se weet dor beid
nix vun — en Geister-Wiehnachtsboom.
Fehlt nich en Engel, de dor sung?
Un — freue dich, o Christenheit?


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet