Notizen ut'n Oostermaand

fröh in st.georg

rootlichtveerdel un regen
straten ahn utweg in't frömde land —
allens lett sik dregen
mit en fründin an de süsterlich hand.

Dat is en Seelsorg, is ja kloor.
Is't Rohr en Minsch? De Minsch en Rohr?
Wenn ik in Noot em roop,
vernimmt mi denn en minschlich Ohr?
Orr krigg ik denn en Rohr an't Rohr?
Ik bün so klook as wie zuvor.
Dat nehmt se cool in Koop.

se laat sik gor nich ünnerkriegen
vun'n snee — se kriegt em ünner fööt.
dor mutt he rein as deko liegen
un winner blifft dat frühlingsbeet.

De Wulken stiegt dat Land to Kopp
un kröönt de Bööm ehr Kroon.
De Weeg sünd uneens, deelt sik op,
een schöner as de anner. Ob
ik düssen orrer den dor gah —
wat deit dat schon?