Lübeck. Grafik vun Jutta BredowLübecker Geschichten:
Vun de Ammen

vun Karl-H. Nissen


Ja, mit de Ammen weer dat so en egen Saak.
Kinner sünd up de Welt kamen, so lang as dat Minschen geven deit. Vadder müss för dat dääglich Broot sorgen, Mudder hett dat Lütte de Bost geven.

Nu hett dat Tieden geven, dor weer dat Mood bi de feinen Lüüd, dat de Mudder dat Lütte nich de Bost geven hett. Dat weer nich goot för de Figur, hebbt se meent. Dorüm müssen junge Fruun her, de ok graad en Kind harrn un de so veel to beden harrn, dat se glatt twee Kinner satt kriegen kunnen. So wat hett dat geven. Disse Fruun, dat weern Ammen.

Hier in Lübeck kemen de Ammen ut Meckelborg, ut Selmsdörp orrer ut Dassow.
Jedet Dörp harr en egen Tracht, bunt, ganz verschieden. In Schönbarg in dat Museum kann man welk bekieken.

Wie man an so en Amm keem? Dat güng meist mit Rümsnacken; de een wüß vun en Deern in Carlow, de anner hett een kennt in Roggendörp.

Nu güng dat nich eenfach so. De jungen Fruun müssen sik ünnersöken laten, wat se leistungsfähig un gesund weern, se müssen na den Stadtmedicus. De harr sienen Platz dicht an'n Markt in den "Tittentastergang". Dat höört sik so en beten groff an, dat weer dat aver nich un müss ok sien. Wenn dat so stimmt, denn weer dat al vör fievhunnert Johr so.

So en lütte Straat gifft dat ok in Wismar, ok glieks an den Markt. Dor heff ik de Geschicht aver en beten anners höört. De Gang is so small, wenn dor ene stramme Deern dörchgüng un vun de anner Siet is en jungen Mann kamen, denn is dat woll vörkamen, dat …

So en Anstellung as Amm, dat weer ne gode Saak, so männichmal sünd de Fruun lange Tiet in dat Huus vun den Herrn Senator orrer vun den groten Koopmann bleven. Se hebbt to de Familie to höört.

Ok in ganz hoge Familien geev dat Ammen. Dat warrt vertellt, dat Anna ut den Spreewald sik üm den lütten Adalbert kümmert hett. Dat weer dat drütte Kind vun Kaiser Wilhelm II.

Oft sünd se al recht jung dorto kamen, so as Annalene. As de noch in School güng, dor hett se ehr Mudder fraagt:
"Wenn ik ut de School kaam, Mudder, wat sall ik denn mal warrn?"
"Mien Deern, wenn du di goot schickst un jümmers braav büst, denn warst du Amme in Lübeck."


Teknen: Jutta Bredow
29.12.2015

 


trüch


na baven


na't Flack

na de Startsiet