Lübeck. Grafik vun Jutta BredowLübecker Geschichten:
Vun anner Amtspersonen

vun Karl-H. Nissen


In de Kanzlei seet nich blots de Polizeisenator Plitt. Later weer dor dat Pass- un Stempelamt in. Un denn weer dor dat Amtszimmer för de "Beerproov". De Beerbruer — un dat geev woll so bi 130 dorvun in uns Stadt — müssen von ehr Beer en Proov levern. Dor seten denn en Raatsherr un twölv Börger, de wat vun Beer verstünnen, un de hebbt dat Beer probeert. Vertellt warrt, dat vun dat Beer beten wat up de Bänke kippt worrn is, de Prüfer hebbt sik mit ehr Büx dor rupsett — un wenn se backen bleven, denn weer dat Beer goot.

Dat geev nich blots den Polizeisenator hier bi uns in de Stadt, nee, wi harrn ok dat richtige Gericht. Klauen, inbreken, so'n Saken hett dat ok in dat olle Lübeck geven. Ehescheidung weer in ganz olle Tieden Saak vun de Kirch, nu aver keem so'n Scheidung ok vör Gericht.

Bruno un Greta Harms weern al teihn Johr verheiraadt, twee Kinner harrn se. Bruno weer to See föhrt, man nu harr he Arbeit up dat Holtlager. Mag sien, dat gefüll de beiden Ehelüüd nich. Dat geev jümmers wedder Larm un Striet. Dor flögen ok mal en poor Töller. Letzt harr Greta dat Jack vull kregen, düchtig, un dor hett ehr dat langt. Se wull weg vun em, se wull sik scheiden laten.

Nu güng dat fröher ok nich fixer as hüüt. De Afkaat bruukt Tiet, de Richter ok. Dor mütt snackt warrn över dat Betahlen un över dat Verdelen. Man denn weer dat endlich sowiet. Mit Töller smieten, Jackvull, de Grund weer klor: unüberwindliche Abneigung.

De Richter Lindenau bläder noch so'n beten in siene Akten, denn keek he över de Brill.

"Ik lees hier, Fru Harms, Se hebben vör en Viertel Johr noch mal Tweeschen kregen, Zwillinge. Vun Ehren Mann, he hett dat nich afstreden. Wie passt dat tosamen mit de unüberwindliche Abneigung?"

Nu keem Greta avers to Hööcht.
"Herr Richter, vun dat Binnenleven vun en Fru hebben Se ja wohl rein gor keen Ahnen! Weten Se, worüm ik de beiden kregen heff? Ut schiere Wut up den Keerl!"


Teknen: Jutta Bredow
23.8.2015

 


trüch


na baven


na't Flack

na de Startsiet