Kunst offen! in Meckelnborg

In Meckelnborg-Vörpommern weer wedder dat Pingst-Kunst-Wochenenn to "Kunst offen!". Grote gele Regenschirms wiest di den Weg to verscheden Kunstwarken. Biller, Plastiken, Keramiken un anner Saken kannst ankieken un mit de Künstler bi Kaffee un Koken över ehr Kunst snacken. Dat is en heel intressant Saak.

Dat Pingstweder weer nich dat allerbest. De Sünn harr sik achter griese Wulken verkrapen un dat weer böös diesig. Aver dat weer nich kolt un wi hebbt uns up den Weg maakt.

De Regenschirm as Wegteken hett bi düt Pingstweder sien Berechtigen!

Mank gele Rapsfeller un blöhende Appelbööm güng uns Fohrt dörch de schöne Landschop vun den Klützer Winkel. En Künstler harrn wi al upsöcht. Sien Biller hebbt uns nich so toseggt. Nu güng dat to den neegsten Künstler.

De Biller sünd nich so na uns Smack

Steenfru

De harr ut luder Natuursteen un Driefholt Figuren maakt. De Oostsee weer nich wiet. Dat weer wat för uns. Höhnergötter hüngen an enen olen Boomstubben. En richtig Kunstwark! De Steen un dat Holt harr he mit sien Fru an de Küst sammelt. Ganz begeistert vun düsse Kunstwarken möken wi uns dörch de frische gröne Saat up de Wiederfohrt.

Höhnergötter

"Dor kiek mal!", reep mien Mann, "dor steiht en Reh up dat Feld." Dat weern sogor twee, aver keen Rehn, ne, dat weern twee Kraans. Schaad, dat dat so diesig weer. Likers heff ik glieks anhollen un de selten Gääst knipst. So dichtbi harr ik noch kene Kraans hier bi uns sehn.

Up den Nahuusweg hebbt wi uns denn ünnerhollen, welk Kunstwark uns am besten gefullen harr. "De Kraans!", repen wi beid wi ut enen Mund. Uns Fohrt an Pingstmaandag hett uns wedder goot gefullen.

Kunst in Meckelnborg is so komodig — eenfach mal hengahn!