Karlheinz Goedtke, Bildhauer vun Rudi Witzke |
Kark in en holsteensch Dörp Dat weer woll in'n Späätsommer 1984, dat mien Fru Inge rutfunnen harr, woans wi mit den Bildhauer Karlheinz Goetdke snacken kunnen, wenn hei mit uns reden wöör. He leev in Mölln. Wi kennten vun ehm "Der Rufer" in Lauenburg un den Kahnschipper vör den Autotunnel in Rendsborg un natüürlich "Till Uhlenspeigel" in Mölln. Wi harrn wat Besünners up uns Harten. Wi harrn to geern een Skulptuur vun een Fleitenspeler, so viertig Zentimeter woll hooch. De schull neven dat Graff vun unsen Jung up'n Karkhoff stahn. Dat aver weer woll een Wunsch, de to utverschaamt weer. Inge nöhm all ehren Maut tosamen un dröög Herrn Goedtke unsen Wunsch vör. Wi harrn nich dacht, dat de berühmte Künstler, de so veel to daun harr, mit en warm Hart up uns inging, uns tohörte. Un dat Wunner passeerte: Herr Goedtke låådte uns in, dat wi ehm Naueres vertellen kunnen. Mit Hartkloppen klingelten wi denn an de Döör Huus "To
de Teigelwischen 38" in Mölln. Een hartliche Minsch mit grote,
flinke Ogen leet sik vertellen. Un jümmer wedder verstünn
hei dat, dörch een Fraag uns Maut to maken, mehr to berichten.
All de Tiet harr hei en Teikenblock up de Knei. Lies knirschte de swatte
Kried. Wöör hei uns wohrhaftig den Muskanten as Bronzeskulptuur maken? Ja! Dat wöör verafreedt, woans dat mit dat Modell un den Guß wiedergahn schull. Wi schullen vun den berühmten Karlheinz Goedtke een Skulptuur kriegen. Un siet Spätharvst 1984 höllt se nu Wacht an't Graff vun unsen Jung, de so schöön Kloornett speelte. Elkeen Dag gahn Dusende Minschen an Goedtkes Skulpturen in uns Land
vörbi, de en Stück vun uns Heimaat sünd. Se hören
hierher to uns. As lütten Dank will ik beten vun Herrn Goedtke
vertellen un een poor vun sien Skulpturen wiesen. Dorna keem de Seiler in Kiel.
De Uhlenspegel in Mölln makte Goedtke upenslaag berühmt. Een anner Bispill för dat grote Wark vun Karlheinz Goedtke is "Der Rufer" in Lauenborg.
Ehrdat ik noch anner Skulpturen wies, mutt Horst Hannemann mit sien Laudatio to Woord kamen. "Goedtkes Wark is vun den humanistischen Geist vun't Avendland bestimmt. Hei hett to den Wedderupbuu na den mitbelevten Krieg veel bidragen. Sien Skulpturen sünd een Deil vun Sleswig-Holsteen. Goedtke hett uns Heimaat noch schöner maakt." 1990 sää Horst Hannemann: "Noch jümmer höllt Karlheinz Goedtke för uns hüüt Levenden dat Arv vun de levig, de för ehm Liehrer un Vörbiller weern."
Goedtkes Vörbiller weeren Kurt Schwerdtfeger, Auguste Rodin, August
Gaul und Gerhard Marcks. Jümmer noch steiht hei mit dat, wat hei
deit, to de olen Traditschoonen, ut de sien Kunst stammt.
Karheinz Goedtke kriggt schon mit, dat de Kunst in uns Tiet to wanken schient, dat wild dischkereert ward, wille "happening" Kunst sünd. Hei nümmt dat up un bedenkt dat nau, hei ward aver nich verunsekert. Sien Schaffen lett hei sik nich dörcheenanner bringen. Hei geiht sienen Weg. Sien Oort un Wies, mi Kunst ümtogahn, föhrt dortau, dat hei een besünnern Updraag kriggt: de wunnerschööne Nausikaa in de Lübecker Uni. Dor hett se ehren Platz funnen. Fru Lisa Dräger hett se stifft. In en Ansprååk sää Professer Hoppe, dat de Skulptur en reizvull Unbefangenheit hett. Liekers aver drückt se en bestimmt Verwachten an de jungen Lüüd ut. Hei gifft sien Höpen Utdruck, dat dat anmödige un höpensvulle Upduken vun de Nausikaa all ehr Bekiekers Ja to't Leven seggen lett un se levensfrooh maakt. Wokeen Nausikaa nu is, dat weiten de Bildhauer un Fru Dräger un de Professers, de den Updraag geven hebbt. De Studenten mütten liernen, dat Nausikaa för Gaudhartigkeit un Hülpsbereitschaft, Sachtigkeit un Minschenfründlichkeit steiht, allens Dööchden, de wi uns bi uns Dokters wünscht. Un dat se denn ok dor sünd, wenn se nöödig bruukt ward. Wenn een nu noch miehr över de schöön Nausikaa weiten will, denn kann een allens bi Homer nalesen.
Dat is unmööglich, hier veele Biller vun de över 200
Skulpturen to wiesen, de Goedtke maakt hett un de in uns Land stahn.
Ok de Neddersassen hebbt sik Goedtkes upstellt, so de "Oldenborger
Pierd" un de "Uhlenverköper" vun Ülzen un annere.
Un uns "Stadtschriever", de vör uns Stockelsdörper
Raathuus steiht, schrifft allens up. So ok dit:
De Dumen vun den "Stadtschriever" is blank reven as de vun Uhlenspegel in Mölln. De Bruutlüüd, de in dat Standesamt tosamengeven warden, rieven sik dor ehr Levensglück tosamen. Goedtkes Leven un Schaffen stünn woll unner de ole Redensoort, de wi keen Dag vergeten schullen: "Den Naver schallst du Iehr andaun, Hülp vun Neegsten is de best."
Un wi warden sienen Naam nich mehr vergeten, den Naam vun en groten Künstler, de 1995 stürv: Karlheinz Goedtke, Bildhauer. |
Rudi Witzke
|