...un de Appeln lüchen wied un sied...Philemon un Baucis

Kunstwarken un Natuur ünner de Harvstsünn. Vun Antje Heßler


Se köönt de Biller mit'n Anklick vergröttern. Trüch geiht dat denn mit den Zurück-Knoop (Trüch-Knoop) in den Browser (Bruuser).

To'n Anhören hier klicken:


Lesen deit Antje Heßler in Holsteiner Platt.


De twee, Philemon un Baucis, harrn glööv ik ehr Hand in't Speel, as wi uns Fohrt na Niemünster in den Skulpturenpark plant hebbt. Bi schöönst Harvstweder möken mien Mann un ik uns up den Weg. De in Oktobermaand al deepstahend Sünn lach achter uns vun den düsterblagen Heven un smeet lange Schatten. De vun uns Auto leep ümmer vör uns her, as wenn he uns den Weg wiesen wull. Rechts un links in de Goorns lüchen rotbackig riepe Appels över de Tuuns. De letzten Harvstblomen prahlen mit ehr Farvenpracht üm de Wett. De Fohrt na Niemünster vergüng in'n Nu. Schon bald weern wi bi de eersten Hüüs vun de Stadt.

GardinentuunEn groot Schild "Skulpturenpark" wies uns den Weg. Wi weern dat eerst Mal dor. Achter en Tuun ut Glaswännen mit Gardinenmuster stünn en staatsche Villa, dat weer de Villa Wachholz. En Jugendstilvilla, de 1903 vun den Architekten Hans Schnittger för den Fabrikanten Paul Ströhmer ut Niemünster buut woorn is. Hüüt is se vun dat Ehepoor Gerisch för de Kunst wedder to'n Leven weckt woorn. Glieks in den mit Ekenholt täfelten groten Vörruum stünn en modeern Plastik. En hoge tweeflügelig Döör let den Blick in en groten hellen Ruum mit hoge Finster to. Dörch de full dat helle Sünnenlicht.

Villa Wachholz

Dat Café

In'n FlurAn de Kass kregen wi vun en junge Fru de Inwiesungen för de Besichtigung vun den Skulpturenpark. Nu müssen wi aver na de Autofohrt eerstmaal en Tass Kaffee drinken. Dat Café weer in de fröheren Wohnrüüm ünnerbröcht. Modern un schlicht Gestöhl pass goot mit de Jugendstilutstattung tohoop. Allens weer fien opeenanner afstimmt. De Blick na buten in den bunten Harvstpark weer en Genuss un hett uns besünners goot gefullen.

Café mit Parkblick

Wi harrn noch en poor Fragen un güngen wedder to de Fru an de Kass. Dor kregen wi to weten, dat de Park na den Plan vun den Goornarchitekten Harry Maasz in dat Johr 1925 anleggt woorn is. "Wat", meen dor mien Mann "vun den glieken Harry Maasz, de den Schoolgoorn bi uns in Lübeck anleggt hett?" Un Schoolgoorn in Lübeckwohrhaftig weer dat de glieke Goornarchitekt! He hett nich blots den Schoolgoorn in Lübeck anleggt, ne, ok de Ehrenfriedhof is na sien Plan anleggt woorn.

Den Schoolgoorn, ok "Botanischer Garten", in Lübeck hebbt wi al öfter upsöcht. Dat weer ümmer wedder en groot Vergnögen för uns. Dor staht ok twee wunnerbore Skulpturen. Een is de Panther vun Fritz Behn un de anner, de Brunnenfigur "Wasserschöpfendes Mädchen", is vun E. Müller.

Schoolgoorn in Lübeck
In'n Schoolgoorn vun Lübeck

PantherWaterschöppen Deern
In'n Schoolgoorn vun Lübeck: Panther un Waterschöppen Deern

Nu weern wi duppelt neescheerig up den Skulpturenpark hier in Niemünster. Ik möök de Döör na den Park up un kunn mi för Freud över den schönen Anblick kuum wedder inkriegen. "Wat is dat schöön!" reep ik. All de Bööm harrn al ehr bunt Harvstkleed antrocken. Dormang blenkern Brunnen, de mit Feldsteen infaat sünd. Mit Waterplanten insüümte Waterlööp schlängeln sik dörch den Park. De Footweeg weern all mit Blomen infaat. De warme Sünnenschien harr sogoor de Libellen noch wedder upweckt, se flögen mank de Bloom ümher.

Parkland orr...

...Märchenland?

Ole Bööm spegelt sikDe ganze Anlaag liggt meern in Niemünster in dat romantische Schwaletal an enen Hang. Up de Rasenflachen un mank de Boomgruppen staht Skulpturen. Welk Kunstwarke swömmen sogar in't Water. Dor hett mien Mann up den enen Diek "Das schwimmende Kleeblatt" vun Katsuhito Nishikawa funnen. De Gruppen weern mit lütte Brüchen över de Waterlööp un Treppen ut Natuursteen verbunnen. Wi kunnen uns gor nich satt sehn. Een Skulptur hett mi ganz besünners anspraken: de Bronzeskulptur "Kissing Birds" vun Menashe Kadisman. De gellt as Fredenssymbol. De Künstler is ut Tel Aviv.

Swömmen Kleeblatt
Swömmen Kleeblatt

Küssen VagelsSünnlicht

En anner Skulpturgrupp "Schreitende" vun en Polin, Magdalena Abakanowicz, hett mi bös nahdinkern maakt. De Figuren weern all ohne Kopp. Se hett dusende vun düsse Figuren na ehre Entwürfe herstellen laten. Hett se so villicht dormit ehr schrecklich Beleevnis vun den Prager Frühling uparbeit? De groot Tall vun slopend russische Suldaten up den Prager Bohnhof weern för se gesichtslos. Se güngen ehr wull nich ut den Kopp. —

Schreitende

Verhalen op en BankAver de wunnerbore bunte Park leet mi de grugelige Grupp gau vergeten. Mien Mann hett sik in de Twischentied up en Holtbank verhaalt. Ik weer na niege Fotomotive ünnerwegens. Överall weer noch wat to finnen. Ünnerhalv vun de Villa stünn so'n lütt romantisch Backsteenhuus. In den Gevel weer för de Ulen en Ulenlock. De Fru an de Kass vertell mi, dat weer fröher en Duvenhuus.

Gevel mit Ulenlock

MärchenlandDuvenhuus

Dor wöör ik mit eens in den Park noch twee besünnere Bööm wies, seeg meist ut, as wenn se sik gegensiedig stütten. An beide Bööm weern Schiller anbröcht. Seker stünn dor de Boomoort up. Aver ne, ik lees an den enen Boom "Philemon" un an den annern "Baucis".

Philemon un Baucis"Kumm doch mal her", reep ik mien Mann to. "Wat is denn los?" fraag he mi. "Kiek doch mal, hier staht Philemon un Baucis!" He keek mi fragend an: "Keen sünd dat? Mütt ik dat weten?"

Philemon un Baucis

Dor heff ik em de Geschicht vun Philemon un Baucis, en Leevspoor ut de Antike, vertellt:

"Weetst Du, de Göttervadder Zeus un sien Söhn Hermes besöchen as Minschen verkleed en Stadt vun de Minschen. Narms wöörn se as Wannerslüüd upnahmen, egaal an welk en Döör se kloppten. Blots Philemon un Baucis, en oles Ehepoor, dat an Rand vun de Stadt in en armselig Hütt leevte, hebbt de beiden rinnlaten. Gastfründlich hebbt se de beiden Frömden inlaadt un bröchen dat up den Disch, wat se harrn."

PhilemonBaucis

Mien Mann keek mi an un höör niep to. Ik vertell wieder. "Stell di mal vör, eerst dörch enen Tofall sünd de beiden wies woorn, dat de Frömden Götter weern. Ganz verbiestert hebbt se sik för dat eenfach Eten entschülligt wat se de beiden vörsett harrn. De Götter aver danken de beiden olen Lüüd up ehr Oort. Se möken de eenfach Hütt to enen güllenen Tempel un de beiden to Priester. Ok den Wunsch vun dat Poor, de ümmer noch in depe Leev toeenanner stünnen, ümmer tohoop to blieven, erfüllen de Götter. As se denn to glieke Tiet doot bleven, verwanneln de Lütt BrüggGötter Philemon in en Eek un Baucis in en Linnenboom." Ik keek mien Mann an: "Is dat nich en schöne Geschicht? Un hier staht nu Philemon un Baucis. Un se sünd ümmer noch bieenanner!"

Tofreden un glücklich över den schönen Dag möken wi uns up den Nahuusweg. Uns Gedanken weern ümmer noch bi Philemon un Baucis. De harrn uns enen wunnerboren Dag bescheert!


Beten wat to den Skulpturenpark in de Villa Wachholz
finnt Se ok bi de Gerisch-Stiftung.

Fotos: Heßler/Schwippert
2.11.2008

trüch


na baven


na't Flack

na de Startsiet