Al in'n Sommer keem düsse CD rut, de würklich Spaaß maakt. Dat is fundeerte Blues, de Jungs köönt dat, un dorför sünd se ok al bekannt. Dat Besünnere bi jüm is de Sound ut Mundharmonika un Slagtüüch. Mi gefallt de so good, den kunn ik ok pur verdragen - ahn Gitarre un allens. (Dat gifft ok mal op de CD.)

Man op de CD is nich bloots Blues - dor is för mennigeen Smack wat bi. Faken fix rockig, sogoor mol Country-Töön (man ahn Smolt!). Mennig Leeder laat sik goot danzen - t.B. "Josephine" oder "Inflation" un natüürlich de "Tango-Tied". Dat Ganze sünd Live-Opnahmen, nich mit dröge Studio-Atmosphäre un so, man richtig.

Dat Best is natüürlich de gode Musik, man ok dat dat op Platt is, maakt de Saak nich leger! Un dat is dörgängig op Platt. De Texten sünd totaal vun hüüt, ut'n Alldag, lakonisch, mit Sülvstironie - un se sünd natüürlich alle in't Booklet to de CD.

Un de Clou is: Text un Musik laat as ut eenen Guss. Plattdüütsch is as maakt för Blues - veel beter as Ingelsch!

De Jungs hebbt nu ok en egen Homepage, 'neem Se ok in de Songs rinhöörn köönt (www.bluesopplatt.de).

Wenn Se also würklich noch keen Wiehnachtsgeschenk hebbt... man kann dat angahn???

Marlou Lessing