Dat Bawhuus, Deel 12:
Bawhuus in Farve

Van Ludgerd Lüske

As wi dei Bawhuus-Begäbenheit van butsiet g'nau mustert un knipset harrn, fünnen wi dei rode Ingangsdörn. Nao ein kortet Ümmekieken kunnen wi bi ein Föhren dör dat Huus mitgaohn. Einen nette Studentin verkloarde us dor dei heele Binnenwelt. Dat ku'm so drocke gor nich alls mitschieven. Aover dei Direkter van't Bawhuus, Omar Akbar, schriff dortau:
Et geiht üm dat Utbillen van dat Seihn van dei Modernität.

Farvig afsette Etaogen, Treppenhuus-Ansicht nao baoben hen

Flurecke mit Dörns, dei Funktschionsdeile sünd
dör ehre Eigenfarven harmonischk upeinanner afstimmt

All bi Gropius sien eierstet Plaonen was dat Farvspill van grooten Belang bi dei Hauptvörlaoge van den Baukomplex. Dat Kleuren stüttet einsiets dei Architektuur un spring annersiets doräöver weg, wiel dat neie Farvrüüme giff. So ka'm sik uk bäter orienteern. Mit dat Wedderfinnen van disse Farven mutt'm den Mythos van Gropius sien radikaol neien Plaon, dei dei Traditschion achter sik laoten harr, korrigeern. Vandaoge wieset dat Bawhuus wedder siene historischke Verschiedenheit in dei Architektuur-Moderne. So bliff Kontinuität un Bräken mit dei Kultuur van't 19. Joahrhunnert tau seihn dör rode Dörns, grieswitte Fensters un ornametaol-farvig ansträken Wände.

Audimax, Farvspill mit warmfarvde Sitze vör dei farvig
trüggaohn Achterwand gägen dei lechten Fensterfront

Heizradiaotor, Spill mit Form un Farven — dei halfhoge Montaogestäe
in den Audimaxruum is för dei Konvektschion unpass, aover so anleggt för't Ooge

Rutkaomen schull bi dei Anlaoge van dat Bawhuus ein Tausaomegaohn van all dat künstlerischke Daun tau ein Wark. Ein Ingaohn van alle Warkkunst un technischket Käönen in eine neie Baukunst schull so aohne Updeilen ein Deinst för dat Lebennige wän.
Nich eiers dör dat neie Farvsetten löst sik dei Indruck van ein strenget, blots nao dei Funktschion plaontet Bauwark up, wat dei meesten as Bild van ein modernet Huus ansehgen.

Büro van Walter Gropius, unner den lecht-geelen Bäöhn
sett sich dei blaw-griese Wand keuhl af

Audimax-Ingang, sachtet Farvspill in Kunst- un Daogeslecht

Mangers lett dat nu bolde as ein "modernet Patchwork", naodem 'ne Riege Generatschionen van Restauraotoren an un in dei witten Kuben ümmetauwarkden.
Bi dat nu afschlaoten Saneeren hett man disse unnerscheidliken Baulaogen deils konserveert un deils uk restaureert. So schull dei Taustand van 1976 gägenäöver den restaureerten Plaon van 1926 tau seihn blieben, as dei Naokriegsschaoden wegmaoket wörd un dei DDR dat Bawhuus nich mehr as ein formaolistischket Denkmaol ut dei 50er Joahre verurdeilde, sünnern flägde un hochachde.

Äöver dit Verfoahren giff et ümmer noch Striet, aover man hett dat extrao so daon, dat'm dat ästhetischke Bild ut dei eierste Bawtied wedderkriegen deit. Up dei annere Siete schullen deils Dokumente van dat historischke Gägenäöver van Kaputtmaoken un Wedderupbawen in 20. Joahrhunnert wieset wern.

Nu kann dat Bawhuus mit dei wedderfunnen Farvigkeit van dit Bauwark wedder mehr Populaorität kriegen, dit maol as eine bunte Ikone van dei Moderne, dei an sick nich so spartaonischk anleggt is, sünnern sinnenfroh.

Bi den Gang dör dei einkeln Bawhuustrakte wörden us disse einkeln Saoken tausaome mit einen mojen Vördag naohe bröcht. Dat'm uk äöverall binnen knipsen dröfde, gefüllt us natürlik b'sünners gaut. Bi't Rutgaohn dachden wi all an dei Meesterhüüser, dei nu up usen Plaon stünnen. Of'm dor uk woll so frei mit dei Kamera warken kunnde, mößen wi eis afteuven.

Signaoldrode Ingangsdöörn,
van düster-griese Pielers inraohmt

Links:

• Mehr äöver de Farvgestaltung