Dat Bawhuus, Deel 1:
Geschicht van't Bawhuus

Van Ludgerd Lüske


Disse Biller sünd nich originaol, sünnern ein digitaolet Anlähnen van Ludgerd Lüske. Sei käönt dei mit'n Anklick vergröttern. Trügge geiht dat denn mit den Zurück-Knoop (Trügg-Knoop) in den Browser (Bruuser).

BreifmarkeBawhuus aohne Originaolbiller! "Wat is los mit dei Künst?" ka'm dor fraogen. Eine groote Tied in't 20. Joahrhunnert, wor wisse groote Künst upstünden, kann in't Internet nich frei wiest wern. Jao, dat is so! Schall man nu bedreuvet wän, sünd dei Kunstlüe van' Padd af? Urhäverrechte, dei schäöllt dei Künstlers ehr Inkaomen inbringen. Wat steiht dorgägen? Dor kann doch woll nüms gägen wän? Freie Informatschioon, freie Lehre, freiet Kultuurgaut is dei annere Siete. Wovull Stüergeld sitt in den Kunstbedriev, wor bliff dei Allgemeinandeil? Dat Leßte, so schinnt et, geiht bi den Striet, frei bruken of nich, unner. Forts, wenn ein' dor ehrenamtlick 'n bäten allgemeine Informatschioon beiern will, staoht soneumte Verwertungsfirmen up un fördert ehren Geldandeil, un dat nich tau minne. Klick op to'n Vergröttern!Dat is us bi Plattpartu uk al so gaohn. Nu heit et, vörsichitig wän!
Wo schall man nu dei Künst ut dei Bawhuustied vörstellen — aohne dei wunnerboaren Originaolbiller? "Wo is et mit sülvs maokte Biller?" Dat is uk forts dei Antwoort!
Bawhuus, wat steiht dor achter? We'm sik dat Bawhuusteiken ankieken deit, süht man vellicht all 'n bäten van disse Kunstrichtung upblinken.

"Ein Wäsen, mit all siene Sinne, utbilled dör dei tau Tied besten Künstlers un Architekten, schall Gägenwoart un Taukunft van ein modernet Joahrhunndert utfinnen."

So sehg dei Maoler Oskar Schlemmer dat Bawhuus-Teiken.

Dat Bawhuus

Dat Bawhuus is in dei Geschichte van't 20. Joahrhunnert för Kultur, Architektur, Design, Künst un neie Medien heel wichtig. Et was eine van dei eiersten Hochschaulen för Gestaltung, wor eine Riege van dei üpsten Architekten un Künstlers ut dei Tied tausaome kaomen kunden. Dor stünd nich blots dat pädaogigschke Utbillen, sünnern uk dei internatschionaole Diskussion in den Brennpunkt. Et geev bold kiene annere Inrichtung as dat Bawhuus, wor in eine krisenhafte Laoge dei Fraoge stellt wörd tau dat Regeiern äöver den Moderni-sierungsafloop mit Gestaltungsmiddel.

Dei Meesters un studeiern Lüe van dat 1919 sik in Weimar gründen Bawhuus wullen dei Künst un dei Produktschioon tausaomebringen dör ein Besinnen up Handwarkstraditschioonen as Grundlaoge för all dat künstlerischke Warken. Sei wullen Saoken un Rüüme mit Vörbild för eine humaon wern Sellschup upbawen. Unner dat Leit van sienen Gründer un eiersten Direkter Walter Gropius (1883-1969) wende sik dat Bawhuus 1923 nao ein binnen afloopen Upkloren dei Industrie tau. 1923 wiesde dei unner den Leitgedanken "Kunst un Technik — eine neie Einheit" aopenmaokte Utstellung dat heele Spektrum van dei Bawhuusarbeit. Mit dat Huus Am Horn wörd eine Vörstellung van Waohnen in dei Taukunft vermiddelt.
Wägen dat Drinsen van den konservaotiven Kring wörden 1924 dei Middel för dat Bawhuus weust runnersettet, so möß et sik eine neie Unnerkunft seuken. Mit dat Äöversiedeln nao Dessau, in dei Tied mit einen Wirtschkupsupschwung, wörd dat Bawhuus eine kommunaol draogen Hochschaule för Gestaltung. Bold alle Meesters wesselden räöver nao Dessau. Dei vörmaols studeiern Lüe äövernöhmen as Jungmeester dat Leit van dei Warkstäen. Van 1926 bit 1932 entstünden in Dessau hochanseihn Warke in Künst un Architektur un uk bedüüen Designvörlaogen.

Klick op to'n Vergröttern!

Dei Raohmensaol

Mit Lecht ein Raohmensaol,
kassenhaft un kaohl,
Farven in ein Optikspill,
un dat Ooge hollt nich still,
dör den Ruum 'n Blick,
mit den Formenkick.

Ludgerd Lüske

Neie Dörgripp. - Klick op to'n Vergröttern!Van dat staodige Strien (Strieden) üm den wiedergaohn Bestand van't Bawhuus möör worn, treet Walter Gropius sienen Direkterposten af. Nao üm kööm dei Schwiezer Architekt Hannes Meyer (1889-1954). In siene Arbeit bawde hei up eine harmonischk anleggte Sellschkup. Dör eine Kosten spoaren industieoartige Massenproduktschioon schullen för dei meesten Volkslüe dei Produkte priesgünstig wern. Ofgliek hei Erfolg harr, wörd in dei tauspitzden binnenpolitschken Laoge af 1929 dei marxistischke Orienteerung van Hannes Meyer för dei Stadtüpsten ein Problem, 1930 wörd hei afsettet.

Unner Ludwieg Mies van der Rohe (1886-1969) wassede dat Bawhuus af 1930 ut tau eine Oart Technischke Hochschaule för Architektur mit anschlaoten Künst- un Warkstäe-Ressorts. Nao ehr Upkaomen verdreeven dei Natschionaolsozialisten in' September 1932 dat Bawhuus ut Dessau. In Berlin, wo dei Schaule hentrück, harr dei blots 'ne korte Tied: 1933 geev sik dat Bawhuus unner den Druck van dei Natschionaolsozialisten sülvs up.

Bawhuus-Rosette. Klick op to'n Vergröttern

Nao dit truurige End geiht et wieder mit Walter Gropius, dei kreeg et jüs so mit dei Natschionaolsozialisten tau daun un güng 1934 in't freie Utland.




trüch


na baven


na't Flack

na de Startsiet