Appelbööm

vun Katja Renfert

Eva un Adam, hier ünner en Ahornboom

Adam un Eva, de de Maler, Grafiker un Bildhauer Hanno Edelmann (born 1923 in Hamborg, 2013 storven) 1990 ut Bronze maakt hett, sitten nich in'n Goorn Eden, sünnern ünner enen Ahornboom op'n Helmut Steidl-Platz in Hamborg-Rahlstedt.

Woher hett Eva denn den Appel, den se fasthöllt? Mutt ja vun en Appelboom ween.

Un wat för en staatschen Appel dat is!

Ofschoonst Hamborg en Grootstadt is, gifft dat 'n Barg Appelbööm. To'n Biespeel in den nieen Lohse-Park in de Hafencity, in'n Stadtpark in Hamborg-Winterhude, in'n Westerpark in Hamborg-Klein Flottbek, in Hamborg-Allermöhe un an annere Öör, wo sik de Lüüd Appels vun de Bööm nehmen köönt. Or opsammeln.

In en romantisches Fruunsgedicht seggt de düütsche Autorin Helene Brauer (born 1889, storven 1925) – vun mi in't Plattdüütsch översett:

„Kiek, dat dröm ik
för di un mi:
en Rosenstruuk an
gröne Goornstiegen,
un ünner en vun en
Appelboom sien Twiegen
en Dämmernavend köhl un fierlich.“

(Quelle vun't Original: hier)

En sünnern Appelboom steiht in'n Loki-Schmidt-Goorn (Botanischen Goorn) in Hamborg-Klein Flottbek. Siet den 4. Mai gifft dat dor de „begehbare Ausstellung“, dat „keltische Baumhoroskop“, de bit to'n 3. Oktober 2016 to sehn is.
De Hamborger Boomschool Lorenz von Ehren hett de Bööm na den Keltischen Maandkalenner opstellt.

Siet ewige Tieden speelt Bööm en groote Roll för de Minschen. Se gellt ünner annerem as sünnermaten Springborn vun Kraft un Gesundheit. Se sünd keen dode Materie, sünnern lebennige Wesen, de en bestimmte Energie afstrahlt. Un düsset Kraftfeld geiht an de Minschen wieder. Al de chinesische Philosoph Konfuzius (born 551, storven 479 vör unse Tietreken) schall seggt hebben: „Welkeen Bööm plant, ward den Himmel winnen.“

För de Kelten stünn de Appelboom as en Symbol för de Fruchtbarkeit, un in Märken is de Appel vun düssen Boom uk en Tövermittel. (Quelle: Annette Wagner/Peter Michel: „Bäume – Kraftplätze und Heiler“, Tosa Verlag, Wien 2000)

De Appelboom is een vun de 21 Bööm in düssen Krink.

In de Gröötwöör för de „Norddeutschen Apfeltage“ seggt de Hamborger Pädagogin, Natuur- un Plantenschützerin Hannelore „Loki“ Schmidt (born 1919 in Hamborg un dor 2010 storven) as Kinnertietserinnern, se hett jümmers gern ünner en Appelboom legen un de Wulken bekeken.

Dor harr se wull noch nich wußt, dat Helmut Heinrich Waldemar Schmidt, mit den se op'n Gymnasium in Hamborg in de sülve Klass gung un den se later heiraat hett, sülms 'n Appelboom weer!

De SPD-Politiker un föffte Bundskanzler vun de Bundsrepulik Düütschland un vun 1983 bit to sien Doot in November 2015 in Hamborg Mitrutgever vun dat Weekenblatt „Die Zeit“ is nämlich 1918 een Dag vör Hilligavend, den 23. Dezember, op de Welt kamen! Un in dat keltische Horoskop gellt sülk Lüüd as en Appelboom, de twischen den 23. Dezember bit 1. Januoor or vun 25. Juni bit to'n 4. Juli born sünd.

Junge Appelboom blangen en Fiegenboom

So süht de junge Appelboom in dat Boom-Horoskop in'n Loki Schmidt-Goorn ut – un, Tofall or würklich na den Keltischen Maandkalenner opstellt, steiht de Fiegenboom 'n Stück wieder rechts!
Da fallt mi ja glieks wedder Adam un Eva in ...

Hier sünd poor vun de noch lütten Appels to sehn, un wenn de Sünn, de allens wassen lett, ornlich schient, köönt de Frücht riepen.

Op düsset Schild steiht, „de Appel (Malus) güllt as en Symbol för Utstrahlung, Charme un dat glöven an dat Goode in'ne Minschen. Sien Kreativität un Schöpfungskraft laaten em uk swoore Situationen meistern. Sien ruhiges, aver uk toglieks kloores Verholen gifft de Minschen in sien Ümgegend Geborgenheit.

Klick up to'n Vergröttern!

Ünner günstige Bedingungen kann de Appelboom beruflich 'n Barg op de Reeg kriegen, mennigmal steiht sien Lebenslust gegenan. All Eegennutz is em fremd, un so ward sien Güte un Groottöögsch af un to vun annere Minschen utnutzt.

Lüüd, de in düsse Appelboom-Tiet born sünd, hebbt den grooten Wunsch, to leven un leevt to warrn. Wenn se en Partner finnen doot, de ehr seelische Veelfalt erkennt un unnerstützt, blöht se op to en charismatische Persönlichkeit.“

Op düsse Wöör op den Altkanzler Helmut Schmidt todraapen hebbt?

En poor annere „Appelbööm“ na dat keltische Horoskop sünd to'n Biespeel de Bildhauer Hans Kock, de Autor Anton Philipp Reclam., de Autorin Ingeborg Bachmann, Antoine St.Exupéry, un de Philosoph un Wetenschopler Gottfried Wilhelm Leibniz.

Sünd Se nu nieschierig worrn, wat för en Boom Se sülfst sünd? Dann gaht Se doch, an de Skulptur vun den en Appel etenden Adam an'n Hauptingang Ohnhorststraat 18 (dat is bi de S-Bahnstation Hamborg-Klein Flottbek, Bus 21 un 115) vörbi, rin in dat schöne Paradies, den Loki Schmidt-Goorn.

Jümmer wedder, wenn ik dor weer, hebbt Kinner bi't keltische Boomhoroskop opregt ropen: „Wat för en Boom bün ik?“

Un denn hebbt se an jeden Boom keeken, bit se ehrn Bordsdag funnen harrn.

Uk, wenn Se villicht nich doran glövt, wat dat Keltische Boomhoroskop seggt: en schönen Spazeergang ward dat allemol! Un wat sünst noch allens dor to sehn is: bghamburg.de.