De Vagelhuussöök
Se seggt to em: "Nu is't
so wiet!
Ik heff dat nu entscheden:
Wi bruukt en Hus! Warrt hoge Tied!
Wat hest du mi to beden?"
"Äh, ja",
seggt he, "du hest ganz recht!
Denn laat uns op de Söök gahn!
Denn dat kann teemlich duern, echt!
Dat kann en ganze Week gahn!"
"En ganze Week? Is Maandag
al!
Dat mutt ja'n Sammelsuus ween!
An'n Sünndag denn op jeden Fall
will ik en schönes Huus sehn!"
Maandag
"Nu kiek eins hier den
Standardkassen!"
"Vun groffen Holt un noch bescheten?!
Nee, so en Huus, dat wöör ik hassen.
Dor will ik wirklich nix vun weten!"
Dingsdag
"Kiek hier in'n Woold!
Kunn dat wat ween?
Dat Huus mit Nummer negen?"
"Wat, negen bloots?! Ik will de Een!
Laat uns foorts wiederflegen!"
Middeweek
"De Maske is na baven
apen,
dat is wohl mehr wat för de Swulken!
Du hest noch nich dat Rechte drapen!
Ik swing mi wedder in de Wulken!"
Dunnersdag
"Düt Huus is vun
twee Kokosnütt!
Is dat nich wat Besünners?"
"En Huus mit Ogen? Wat's dat nütt?
Dat is nix för mien Kinners!"
Friedag
"Düt is en echtes
Vagel-Huus!
De Uul passt op uns op!"
"Dor sitt en Uul! Dat is en Gruus!
Du büst woll mall in'n Kopp?!"
Sünnavend
"Hier is en echtes Leves-Nest!
Mien Schatz, segg, warrst du rood?"
"Hm, ja, bet nu is dat dat Best!
Dat Lock is bloots nich groot!"
Sünndag
"Mit düt Huus laadt
uns Minschen in,
de Vagels leevt! Segg Ja!"
"De Minschen leevt uns? Dat haut rin!
Wi hebbt en Huus! Hurra!"
|