De bunte Vogel
De Stieglitt, Johrsvogel för dat Johr 2016

vun Cord Denker

Melodie: Komm, lieber Mai und mache

He sitt dor mang de Disseln,
de Feldmark is sien Flach,
süht Sünnschien, süht dat fisseln
un piept so in den Dag.
Een lütte witte Vogel,
een Piepmatz as ut Schnee
un as ut Ies un Hagel,
so witt, dat deit meist weh.

De Schöpfer, vull Erbarmen,
nimmt sick den Stieglitt vör,
den lütten, witten, armen:
De bruukt een beten Klöör.
Wo kunn ick dat vergeten,
dat mook ick wedder good!
Dor is noch Farv — lütt beten,
lütt beten schwatt, geel, rood.

So kriggt de witte Flatter
mol hier un dor een Strich:
De Schöpfer harr een Tatter,
dat em de Pinsel flöög,
wull Fieerabend moken,
de Sabbat kääm in't Land,
un all de Arbeitssaken,
de müssen ut de Hand.

De Pieper is nu bunter
noh siene Tied in Witt,
he föhlt sick stolt un munter
un grööt uns mit "Tieglitt"
"Tieglitt" dat is sien Singen,
dat klingt nu öber't Feld,
den Schöpfer Dank to bringen
un Freid de wiede Welt.


Foto Stieglitt 1: Francis C. Franklin/Wikimedia Commons
Foto Stieglitt 2: JJ Harrison/Wikimedia Commons

15.5.2016


na baven