Dat kannst mi glööven!
Vincent van Gogh: Een Heven vull van Steerns

vun Heinrich Siefer


To'n Anhören hier klicken:
Lesen deit Heinrich Siefer.


In de Tied, wor düüster Denken üm manges den Dag över kien Lecht seihn löt — jüst in de Tied maolt he in Südfrankriek siene moisten Biller, vull van Klöören, vull van Lecht: Vincent van Gogh, geboren 1853 in Groot Zundert in Holland, upwassen in 'n Pastorenfamilge. He is een Tied sogaor uk Pastor un Prädiger wäsen. Man he fünd in sienen Gloven kienen Trost. Een Gott, de dat Elend süht un nicks ännert, dor köm he nich mit torechte.

De Kunst heff üm all frauh interesseert. Man erst üm dat Johr 1880 hang he den Talar up 'n Naogel un nümmt den Pinsel in de Hand. Siene ersten Biller wörn noch heller düüster, mit minne Klöören. 1868 treckt he nao Paris. Dor levet sien Brauer Theo. He lernt Biller von Gaugin un Cezanne kennen — Biller mit veel Farwen un Geföhl. Dat gefallt üm. As et üm in de Stadt Paris to ruuserig wedd, treckt he mit Gaugin nao Arles in Südfrankriek. Dor maolt van Gogh nu den gröttsten Deel van siene Biller, de vandaoge in veele Museen to bewunnern sünd.

Man de Fröndskup mit Gaugin hollt nich. Van Gogh is uk wat eegen. Fallt bi Tieden in en deep düüster Lock, weit manges nich worhen mit sik. Lüüe laot't aff van üm. Dat lätt üm bloß noch deepsinniger weern. Man jüst in disse Tied maolt he een Riege van Biller mit Steerns an 'n Heven. Is de Heven bi wecke Biller — so as bi de Karken van Auvers — leddig, aohn een Lüchten. In de Biller van 't Straotencafé, Steerns an 'n Heven över de Rhône un de Nacht vull van Steerns düükert wat up, villicht uk in van Gogh sülvest, wat Schuul, Trost un Haopen geven deit.

Wenn ik doran denke, wat sik binnen mi rögt, wenn ik unnern Heven vull van tinkeln Steerns staoh, dann is et up een Siet dat Geföhl, wo lütt de Menschk doch is, man glieker Tied spör ik uk, dat ik dor een Deel van bün. Dat ik dorto hör. Ik späl in dat gewaltige Universum een Rulle, bün dor nich verloren. De Heven mit sien Steerns breit sik as een Mannel üm mi to un nümmt mi an.

Van Gogh sien lessde Beld is dat van de Steernnacht. Et is dat eenzige Beld, wat he nich buten in de Natur maolt heff, nee, he maolt dat in 't Sanatorium in sien Kaomer. So as he et binnen in sük süht. Of he tolessde sienen Gloven weerfunnen heff, weet ik nich, man doch is dor wat, wat üm dat Leven schients nich mehr bloß düüster seihn lätt.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


17.6.2018


na baven