Dat kannst mi glööven!
Mudderspraoke

vun Heinrich Siefer


To'n Anhören hier klicken:


Lesen deit Heinrich Siefer.


Annerlessdens vertellde mi en Mitarbeiterin in de Ollenpleeg, dat se sik vör kotten heller verwunnert har. Se har mit 'n öllere Froo to doon hat, de, so as man up Platt woll seggen deit, in de Kinnertied trüggegaohn was. De Froo har meue un truurig up 'n Stauhl säten un bloß stief vör sik daolkäken. Aohn groot to överleggen har se up Platt fraogt: "Wat laotet Se ja vandaoge den Kopp deip hangen, geiht et nich gaud? Schall ik mi ein bäten bi Ehr daolsetten?" Mit'nmaol was ut de stillen Daome ein krägel Menske worn. Se har sik risk up hensettet un mit 'n klore Stömme van ehre Familge un ehren Huuse vertellt. De Kollegin, mit de se sik dor löter över unnerhollen dö, de was uk schierweg verbaost. Se har vörher uk all maol versöcht, de ollen Daome wat uptomüntern, man de har gor nich reageert, as se ehr fraogt har: "Was ist denn los mit Ihnen, wollen Sie nicht mit zum Kaffee kommen?"
"Ik hebb ehr eenfach up Platt anprootet", mennde do de anner Kollegin. "Dor heff se forts up toschlao'n!"

Wat de beiden in de Ollenpleeg dor belevet hebbt, dat giv dat faoken to vertellen. Dat heff mit use eersten Spraoke, de wi lernt hebbt, to doon, use Mudderspraoke. Wenn wi de hört, föhlt wi us glieks as Tohuuse. Mudderspraoke röögt us Geföhl, us Harte an.

Wi wätet vandaoge, dat Lüüe, de dement sünd, in ehr Mudderspraoke bit tolessde annprootet weern könnt un us in ehr Mudderspraoke vertellen könnt, wat ehr up 'n Harte ligg, wat se sik willt off uk nich willt.

De eerste Spraoke, use Mudderspraoke, waohnt deep binnen us. Un dor wohrt se för us aal dat up, wat ton Leven nödig is: to spören, dat ein us leev heff. Wenn nu wor use Mudderspraoke ankling, dann hör wi dat glieks mit. Et is as dat Erinnern an dat goode Woort van us Mudder, de us straoket, wenn wi bange sünd, un us good is.

Mudderspraoke geiht to Harten. Is dorüm eegentlich uk kien Wunner, dat Martin Luther wullt heff, dat de Lüüe Gotts Woort in ehr eegen Spraok, ehr Mudderspraok, künnig maoket weern schull: üm dat dat deep na binnen — to Harten geiht.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


Bild: Susanne Zingel

8.10.2017


na baven