Reformationsdag 2018:
Wat blifft vun't Lutherjohr?

vun Hans-Eberhard Schulz



Leed "Ein feste Burg" in't histoorsche Sangbook vun 1545

Wat blifft uns nu vun't Lutherjåhr 2017? De damaalige Ratsvörsitterin vun de Evangeelsche Kark in Düütschland Fru Pastoor Dr. Margot Käßmann is mit uns dörch dat 500. Jubeljåhr as "Reformations-Botschafterin" gahn.

Mit veel Zaster hebbt se Steden vun't Erinnern rutputzt. Professoren un Pastoren streden sik üm dat Bedüden vun Luthers Utsagen to verschieden Flachs to verschieden Tieden un de ehr Folgen för de Minschen, ja, de Folgen in de Geschicht. Un een täuwte up den annern, wat vun em orrer ehr niege Ideen orrer Anschubbse kämen, woans un wodörch woll nieges Leven för den Gloven kamen kunn.

Un denn dit: Fru Käßmann güng vörtiedig up't Olendeil. De Mitglieder-Tahlen in de Kark güngen jümmer wieder trüüch. Jümmer weniger Mannslüüd willn Preister warden. Ahn de Fruunslüüd sehg dat ok in de Protestantsch Karken ok meist leg ut. Karkengemeinden warden tosamenleggt. Kann en meist nich glöven: Karken warden sloten orrer utsegent orrer verköfft. Den een sien Leed ist denn annern sien Freud: De Kapernaum-Kark in Hamburg-Horn wöör in de Al-Nour-Moschee ümdöfft. De een orrer anner wunnert sik doch, dat in Köln de DITIB-Zentralmoschee as moderenes Buuwark ehr Dören för den Besöök vun 1200 Glövende buut un upmakt wöör.

Wat dat Christendoom noch maal vun sik Räden maakt, alleen dordörch dat wi dor wieder maakt, wo Jesus uphört hett?

Wi mütt dat Niege Testament trüchföhrn hen na den, de an'n Anfang stünn. Up Jesus, de dei Minschen leiv harr. Trüchföhrn up den, den dat alltiets Milliarden maal mit sien Lengen gifft. All lengt se sik, lengt wi uns, to glöven un to leiven un to höpen.

Un dortau Luther as Wiespahl:

Dat weer eenmaal een Minsch, de söchte Gott in'n Heven. As hei en Ledder sehg, de na baven upricht weer, kladderte hei hooch. Dat güng jümmer wieder na baven. Dat wöör stiller, leddiger un kolder.

Un as hei mal stahn bleev un utpuuste, keek hei trüüch up de Sprotten. Dor wöör hei an'n Faut vun de Ledder dat Christuskind in de Krüff wies.

Dor kiehrte hei furts üm.


31.10.2018


na baven