Propst Grüber

vun Karl-Heinz Sadewasser



Marienkark in Rummelsburg, Foto: Pko/wikimedia commons

Vör Tieden wier ik up en Fier vun den düütschen Verein in Miastko, dat wier früher eis Rummelsburg in Hinterpommern. Bi dei düütschen Frugens ut Stolp seet en oller Mann, dei wier al över 90 Johr olt. Hei wier Pole un heit Alexander Glodkowski.

Ik fraag em, woans hei denn woll so gaud düütsch spreken künn. Un denn vertell hei mi sien Geschicht. Alexander Glodkowski wier as ganz jungen Kierl na den Polenkrieg na Berlin as Zwangsarbeiter kamen. Dor müss hei in en Gasanstalt arbeiten.

As hei Fotos von sien Arbeit maken wull, keem hei gliecks — as wier hei en Spion — in dat Konzentrationslager na Sachsenhausen. Ganz dicht bi leeg de berüchtigt Klinkerfabrik.
Dor hebben dusende Ingespunnte bi Hunger un Frost Klinker för Berlin maken müsst.


KZ Sachsenhausen. Foto: Bundsarchiv

Veel Minschen sünd dorbi ümkamen. Mien nieg Bekannter Alexander Glodkowski ut Stolp hett dat överleevt, wieldat hei blots en poor Monat dor west is.


Heinrich Grüber. Foto Jumbo 1435/Wikimedia Commons

In Berlin leevte tau dei Tiet ein Paster Heinrich Grüber. Dei hett nich weg keken, as dei Juden pisakt un in dei Lagers bröcht wörrn. Nee, hei hett mit Helperslüüd dorför sorgt, dat över 1000 christliche Juden ut Düütschland rut kunnen. So wier ehr Leven reddt' un sei kemen nich mihr tau Dood in dei Klinkerfabrik orrer annerswo.

Nich wiet weg von dat Loger Sachsenhausen steiht ein grodes Gebäude. Dat wier eis de Verwaltungszentrale von all dei Nazilogers in ganz Düütschland un Europa. Hüt is dor dat Finanzamt unnerbröcht mit dei Adress Propst-Grüber-Platz. Neben dei grod Dör steiht dor nu up einen Granitsockel eine lütte Grüber-Büste. As dei November 2011 tau Enn' güng, wier sei tauierst tau bekieken. Fief Ururenkelkinner von Propst Heinrich Grüber (1891-1975) hemmen tausamen dat Dauk von sienen Kopp wegtreckt. Twei Musikers speelten dortau Bonhoeffer sien Lied ut dat Berliner Gefängnis "Von guten Mächten wunderbar geborgen, erwarten wir getrost, was kommen mag".

Eis hett ein hoge Nazi Eichmann den Berliner Paster fraagt, worüm hei woll so för dei Juden sorgen wörr. Heinrich Grüber hett em dei Jesusgeschicht vun den barmhardigen Samariter vertellt. Dei wier nämlich nich vörbi gahn an einen Minschen, dei ünner dei Räubers fullen wier.

Jesus sä an't End von dei Geschicht: Un nu gah hen un maak du dat ok so.


Barmhartig Samariter, maalt vun Paula Modersohn-Becker


17.1.2012


na baven