Dat kannst mi glööven!
Tausaome hörn

vun Roswitha Osterbrink


To'n Anhören hier klicken:
Lesen deit Roswitha Osterbrink.


In't Fehrnsehn wiesden sei annerlestens ein Bericht över ein Ehepaor, dat at "Klinikclown" ünnerwägens wör. Sücke Klinikclowns giff dat överall in Düütschland. Sei gaoht in Krankenhüser un Ollenhüser. Mit 'n Clownskostüm, eine roe Näsen un eine Perücke maokt sei sück up'n Wäg un verseuket mit lüttke Dönkes dei Lüe, dei krank, old off allennig sünd, eine Fraide tau maoken. Dat Ehepaor in't Fernsehen möökt dat ehrenamtlick.

In den Bericht vertellde dat Paor dorvan, dat sei in eine Inrichtung inlaoden wörn, wor Lüe waohnden, dei in Düütschland Asyl seuket. Lüe, dei kien Tauhuuse mehr hebbt.

An'n Anfang wör dat Paor heller nervös. Dat was för ehr dat eierste Maol, dat sei bi Mensken wörn, dei eine heil anner Spraoke as sei sülms schnacken döen. Sei överleggten sick, wat sei maoken schullden, wenn dei Lüe ehr nich verstaohn döen.
Sei füngen dann an, mit Musik un Dönkes dei Lüe Fraide tau maoken. Dat duurde uck gor nich lange, dann harn sei dei Saoke fein taugange. Dei Lüe lachten un wassen vergneugt. Man kunnde fortsen marken, dat man dorför gor nich dei glieke Spraoke räden mössde.

Jao, aff un an geiht dat uck aohne Wöör. Bi Spaoß un Musik versteiht man sick uck aohne Schnacken. Dann kummp man uck aohne Räden bi'nänner. För dei Lüe in dat Asylantenheim, aober uck för dat Ehepaor was dei Nömdag wat ganz besünners. Dat was tauerste för aale wat Neiet. Kiener wüsste, wat passeierde. Aober sei käömen sick drocke dichter. Tausaome hebbet sei för ein poor Stunnen ehre Sorgen vergäten.

Wenn einer an Gott glövet, is dat uck so: Dei Gloven heff uck sien eigene Spraoke. Mi fallt dat immer ganz besünners up, wenn ick mi maol 'ne Misse van Petersplatz in Rom ankieken dau. Uck bi den Weltjugenddag is dat so. Dor kummp ein grooten Koppel Lüe ut dei ganzen Welt binanner un fiert mit den Paopst eine Misse. Nich aale käönt glieks verstaohn, wat hei segg. Dei käönt sick uck nich immer mit'nanner ünnerhollen.

Man is 't nich doch so, dat man dann bi 't Singen un bäen market, dat wi tausaome hört? Wi verstaoht us mit dei Spraoke van usen Gloven. Dann is dat jüst so at bi dei Klinikclowns: Wi verstaoht us uck dann, wenn wi nich dei glieke Spraoke räden deit. Dor is wat, wat us mitnanner verbinnen deit. Un dor mäöt wi aaltied weer nao seuken!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


7.10.2018


na baven