Zitronenwoter

vun Heinz Tiekötter


Handwarksmeester weern se beide un harrn tosomen een Slosseree. Erwin harr Gold in de Hannen un Alfred weer en ganzen Plietschen, de mit sien groten Fründeskreis för Arbeit sorgt hett. An de hele Küst weern se för gode Arbeit bekannt. De Bookholleree leeg bi Ilse. Dat weer Erwin siene Fro. Ilse weer 'n beten snippsch un holl sik för de Denkzentrole vun dat Ünnernehmen un för wat Beteret. Dorbi wimmel dat in ehre Afreknungen jümmers vun Fellers.

Jemmer Stüerberoter harr den Johresafsluss fardig, de Tallen weern goot un dat wulln se all tosomen bi Broothähn in'n Wienerwald fiern. Ilse harr ehre dree Görn mitbrocht — kost jo nix, wenn de Firma dat betoolt — un sett sik fortsens an de Stirnsiet. As Büroleitersche feuhl se sik as dat Hirn vun de Klitsche un stunn jo öber de Mannslüüd. Dat weern egentlich jo bloots Handwerkers.

Ilse klicker mit dat Besteck an'n Töller, denn se wull bedeent warden.
Se bestell soss Broothähn, sik een Wien, för de Göörn geev dat Cola un de Mannslüüd kregen Kööm un Beer. Dat duer nich lang un en grote Platt mit de Flattermänner stunn vör jem op'n Disch. De Ober legg jem elkeen op'n Töller un stell denn noch bi jeden een lütte School mit warmet Woter hen, op dat en Zitronenschiev swemm. De Göörn keken Ilse an un wüssen nich, woto dat goot sien sall. Ilse ehr Blick wanner to de Mannslüüd, se harr Frogeteken in de Ogen. Se teuv dorop, dat een vun de Mannslüüd ehr opkläär, wat dat mit dat warme Zitronenwoter op sik harr.

Alfred hett ehr holpen un dat Radel leust. He geev ehr den Root, de School in beide Hannen to nehmen un dat Woter mit heel spitze Lippen to slürpen. He keek ehr dorbi to. As se för den Momang genoog harr un de School wedder afsett hett, steek Alfred siene Fingers in dat Woter un befree sik vun dat Brodenfett. Denn nehm he sien Munddook un dreug sik de Hannen af.

Dat weer dat leste Mool, dat dat Gehirn vun de Firma un de Belegschop sik tosomen delektiert hefft.


24.10.2020


na baven