Ik
kann allens, wenn ik will vun Günter Reinhardt Wi weern egentli bloots to'n Inköpen in de dorige Citti-Park
föhrt un so rein tofällig in en Utstilling vun de Filmdeerten-Zentrale
Düütschland landt. Scheun in'ne Middelgang opbuut weern de Terrarien un Käfige,
dekoreert mit veele Planten un Blomen. Un dor kunnst se denn bewunnern:
Slangen, Vagelspinn'n, Schildkröten,
Heuhüpper, Chamäleon, Skorpione un veel anner Deerten. An düssen Vörmiddag weern Gruppen anmeldt un so hebbt mien Fru un ik uns en Kinnergoorngrupp ansloten. Twee Kinnergoornerinnen un so teihn, twölf lütte Jungs
un Deerns vun veer un fief Johrn.
Nu kunn man jo düsse Deerten
nich bloots bekieken nee, dree dorvun wurrn ok rutnahmen ut ehrn
Glaskassen. Sogor Naams harrn de un man durf se anfaten, sik dormit
fotografeern laten. Düsse dree, vertellte de Mann un Trainer vun de Agentur, weern all al inne Gefangenschop born un opwussen, avers liekers nich ungefährlich. "Skorpi" harr vör noch gor nich lang Tiet en Mörder in en Krimi speelt. De Schauspeeler, de dor "ermordert" wurr, harr sik avers verseggt, dat düsse Skorpion to'n Filmen op sien Hals sett wurr, wo he jo luut Drehbook em dootsteken harr. So harr denn de Trainer sien Hals mit den dorigen Skorpion in de Filmkamera holen musst. Avers
ik wull jo vun de dorige Kinnergoorngrupp vertelln. Nu meld sik ok de Kinner. Ja, heten de he Florian un he weer fief. Nu keem wat, wat uns bannig beindruckt hett. Ganz ruhig un völlig normol anter de Jung: "Ik kann alln's wenn ik will." Düsse fiefjährige Bengel harr so een Sülvvertruun, so een klore Vörstellung vun dat, wat he kann wenn he bloots will. Wi Opwussen hebbt uns bloots ankeken un sachs all dat sülvige dacht. Wenn de dorige Jung düsse Instellung bibehölt, denn warrt he seker sien Weg in Leven gahn. Nahsens hett he denn ok noch de Vagelspinn op de Hann nahm un wull ehr ok noch strokeln. Avers dat dörv he nich dat weer nu doch to gefährlich. |
3.8.2008
|