Tekenstünn vör Oostern

vun Antje Heßler


Hüüt weer dat so wiet. De Kinner güngen all mit Eierkartons, vull mit utpuust Eier, in de School. In de Tekenstünn wull'n se alltohoop Eier anmalen.

Op den Schoolweg versööch en von de Jungs ümmer de Deerns to schupsen. Gor to geern harr he seh'n, wenn de utpuusten Eier daalfullen un tweigahn weern. He harr keen Eier mitbröcht. De Deerns krieschen ümmer luut op, wenn he ehr to neeg keem. Endlich weer'n se in ehr'n Klassenruum, un de Jung müß Roh geven.


To'n Malen...


...bruukst Roh un Konzentraschoon

Vör veerteihn Daag harr de Schoolmeistersche an de Wandtafel schreven: "In vierzehn Tagen wollen wir gemeinsam Ostereier bemalen. Bringt bitte ausgepustete Eier mit. Wir wollen den Baum vor der Schule mit bunt bemalten Eiern gemeinsam schmücken. Wer das schönste Ei malt, bekommt einen Preis."

Dor weer dat hele Dörp op de Been. All köffen Eier in. Un to Huus güng dat mit de Pusteree los. Modder müß helpen. Mit en fine Nadel pieks se baben un ünnen en Lock in dat Ei. Denn güng dat Pusten los. Wat in de Eier weer, keem in en groot Schöttel. Mennigmaal güng dorbi ok wat op de Eer un de Footbodden weer düchtig smerig. In't Dörp harr dat lang nich so veel Eier to Meddag geven, un överall röök dat na Koken. Aver all müchen, dat ehr Kind dat smuckste Ei fardig kreeg.


Un all hebbt Spaaß


Muster-Ei

Nu weer dat endlich sowiet. Dat harr klingelt un de Schoolmeistersche keem in de Klass. Bevör de Kinner mit Malen anfüngen, verkloor se noch wat över dat Oosterei. Al ümmer haar dat Ei en groot Bedüden hatt. Dat Fröhjohr weer dor, de Daag wöörn länger, un in dat Ei weer Leven. De Minschen freu'n sik al op den Sommer. Al in fröhere Tieden hett man to Oostern de Eier anmaalt. Nu wies se noch en poor smucke Muster, un denn füngen de Kinner mit de Malerie an.


Düt Ei stekt in en vigeliensche Hasen-Halterung. High-Tech to Oostern!

Se stellen den Karton mit de utpusten Eier un den Tuschkassen op den Disch. Von Modder harrn se en Stricknadel mit enen halven Proppen an't Enn. Dat Ei wöör op de Nadel steken un de Maleree güng los. Mit hochrode Köpp un lustig Plappern güng de Arbeit vöran. Ok de freche Jung harr en Ei afkregen. En von sien Schoolkameraden harr em dat schenkt.

Mit'nmaal fraagt en von de Kinner de Schoolmeistersche: "Wieso bringt eigentlich der Hase die Ostereier?"


Upps, maal gifft ok Mallör!

De Schoolmeistersche keek över den Brillenrand un verkloor de Kinner, dat vör dreehunnert Johr en Bäcker en Malöör harr. He back jeedeen Johr to de Oostertied lütte Lämmer. In sien Heimat nöömt man dit Gebäck "Gebildbrote". De Lämmer sünd in den Backaven ut de Form lopen un segen lütte Hasen lik. Likers köffen de Lüüd sien Backwark. De lütten Kinner muchen de Hasen gern lieden. Dor kreeg de Haas glieks noch en buntes Ei in sien Poten un de Oosterhaas weer trecht.


Gebildbrot (links) un Backfoorm


De eerste Pries

In de Twischentied weer'n reine Kunstwarke ünner de Hann'n von de Kinner entstahn. Dat Ei von den frechen Jung keem sogoor mit in de Wahl för den ersten Pries. He kreeg en ganz roden Kopp, as de Schoolmeistersche dat künnig möök. Dor nehm he sik vör, dat nächst Maal de Deerns op den Schoolweg nich wedder to argern.


4.4.2010


na baven