Snorken vun Marita Pollak Mien Mann und ik sünd siet tweeunveertig Johren verheirad, mit Heuhen un Depen, mit veel Leev, aver ok mit Kreeg und Freden. Dat is ganz natüürlich, denn Fruuns und Mannslüüd sünd vun Natur ut bannig verscheden. Wi Fruunslüüd snorkt nich!!! Op keen Fall! Dat moken blots de Mannslüüd, wi sünd blots en beten kregelig biem Slopen, dat is doch keen Snorken!
Mien Mann hett ganze Woolden ümsoogt, egol wo wi weern, ok in'n Urlaub un mien Nerven wurrn ok glieks mit twei soogt. Jojoo, wenn ik mien Mann blots nich so leev harr, nich! Weet Se, woans sik dat op en Schipp, in'n en Buten-Kabien anhört? Ohauahauaha! Nu hett he aver en Snork-Apparaat verschreven kregen, denn he holl ok noch männichmal sien Aten an'n, un dat is gor nich goot west, ik harr ok noch jümmers Angst üm em hatt. De Apperaat hett en langen Slauch mit en Aten-Mask, de mutt he sik jümmers vör sien Mund hollen, un en lütte witte Mütz, de sett he op, dat hürt allens tosomen, jo und de Snork-Apperaat hölpt em nu bie't Aten. Ik kann nu beter slopen, ok wenn he dormit utsüht, as keem he
vun en annern Steern! Aver ik weet mi denn to hölpen, sacht nehm ik sien Arm, beweg
em as en Hevel wedder no ünnen un steek em wedder ünner
de Bettdeek, so as sik dat hürt, un dat funkschoneert! Nee, ik dreih mi denn eenfach üm, kuschel mi wedder in'n mien
Deek in un bün tofreden, dat mien Mann so en goden Apperaat hett! Wat heff ik nich allens in'n de lang Nachten mit em belevt un mitmokt, un he mit mi! Aver dat Thema kennt Se sekerlich ok, heff ik nich Recht? Aver bloots villicht, Fru Pollak! |
||
21.9.2008 |