Däi Schlach vun Jürgen Brake
Däi hiätt mi doch sewwes för Klock tiënn kuommen laoten. Un nu lött häi mi hie staohn as en dummen Jungen, bläërt in siene Papäiers rüm un spiëllt met sien Kuëggelschriewer. Dat deit häi met Fliet! Dat hiätt häi lährt bi "Schickanäiërn för Anfängers". An Duonnersdach lött häi mi Beschäid seggen: "Sie möchten am Montag um 10 Uhr zum Chef kommen." Dao hiät me dann't ganze Wiäckenennne üöwwer Tied naotedenken. Wat mach häi wollen? Hiässe wat verkatt maket? Hiät sick ümmes beklaget? Becke dann? Ek wüss nicks Odder hiät dat wat met dien Krankfieërn te daun? Hiät owwer doch siene Grünne hatt! Twäimaol Herzinfakt Odder es et man blous, wieldat häi äis kuort inne Firma es? Villichte well häi allemann inne Afdäilunge kennenlährn? Un ek dann as däi Äiëste? Borümm dat dann? Un warraftech däi Äiëste? Näi, stemmt jao gar nit! Däi Mehlmann, däi em lesten Quartal den grouten Afschlüëtt vermasselt hiät, däi was lesste Wiäke ouk bi iäm. Un däi hiät ächterhiär nicks secht un was ganz stickes
Nu kuomm doch endlick tau Potte, du met dien dusseligen Schlips! Middelgries däi ganze Kääl, män däi Schlips, dao küömmet de ganze Äigenheit rut. Wann me ouk süs nicks hiät för de Äigenheit! Däi Schlips, däi es sou bunt, dat häi däi ganzen Brümmers verrückt maken wöüe.
Daofüör hiäs du mi nit kuommen laoten! Daofüör nit! Un daofüör hiäs du mi ouk nit vüör dien Schriewdisch staohn laoten. Dao küömmet noch wat nao!
Jao, wat kann ek denn daoför, wann däi Pumpe nit mäh metspiëllt!
Daomaols in däi Nacht nao diäm Monnatsabschlüëtt. Däi Piene in diän Ahm, dann inne Buorst
däi Anges, dat dat wiërküömmet bi't nächste Maol könne et tau late sien, hiät däi Dokter sacht. Un küörter triän un sik nit iärgern, dat hiät häi ouk sacht. Maok dat maol
Ek mau doch föddermaken. Däi Junge well ouk bolle studäiën. Un dat use Petra nu iëhrn Dokter maken kann, dat es doch ne Schangse, da maut me dat Wecht doch bi helpen! Un dat Hus maut noch aftahlt wääen.
Well häi mi am Enne doch blous bange maken un ek kann nu wiër an miene Arbäit gaohn? Un wat häi mi sacht hiät was blous ne Warnung, dat ek nit mäh krankfiër
Außendienst! Klinkenputzen! Dat kann ek nit mäh! Dat kann ek nit mäh! Jao, daomals, dao was ek noch jungk un guët terächte!
Betahlung op Provisionsbasis! Un däi Inköpers, däi wussen dat. Un wann me däi nicks van däi Provision afgaff, dann gaff et ouk keinen Afschlüëtt. Un keine frië Tied un aowends int Hotelzimmer, blous an däi Wiäkenennen te Huse. Näi, dat kann ek nit mäh! Dao gaoh ek in!
Un aowends int Hotelzimmer un villichte ouk mao int Kinno. En Krimi
odder Wildwest. John Wayne. Wat wöüe däi getz daun?
Däi wöüe opstaohn un diän unwiesen Kääl
bie sien dullen Schlips packen, owwer mit links, un mit rechts wöüe
häi iähm en Schlach unner't Kinn giën, dat häi
op en Stupp ut däi Schluffen kippen dää.
Och , mien Ahm Ek krië däi Fingers nit tesammen! Keine Fuust
Nicks wie rut hier! Mien Ahm! Miene Buorst! Laot di nicks anmiärken. Düör tau! Un nu blous noch büs an mien Schriewdisch. Blous noch oppen Sessel sitten un Luft halen, dann gäiht dat al wiër Däi paar Schrië, däi wää'ek doch wuoll noch testanne brängen
|