Mudderglück

vun Silke Frakstein


Nu is he dor, de lütte Schietbüdel. Liggt warm un dröög bi Muddern.

Negen Moond, wenn allens god geiht, hett dat duurt.

Mudder hett mit di sungen, Gymnastik mookt un du hest ehr in de Rippen bufft, dormit se weet: Bi di is allens in Botter.

Se hett för twee eten, ober bitte nich an den Glimmstengel hungen.

Vadder hett ok Gymnastik mookt, ober mehr so mit de Beerglöös.

Beer wullt du im Momang noch nich, ober wo weer dat mit Melk? Gifft dat hier villicht nix? Na ja, veel is nich dor in den beiden Stationen. Dat kann ik ut eegen Beleven vertellen.

Ik weer so’n lütten Mickerpott. Veer Pund heff ik op de Woogschool bröcht. Kommentar vun Mudder Griepsch: "Eine 50-Pfennig-Puppe, aber mit großen Füßen."

Dat wull ik gor nich weten, ik harr Hunger un heff dat mit mien mickerige Stimm ok künnig mookt.

Söss Froonslüüd in den groten Sool vun de Finkenau un Superstimmung. Ene vun de söss harr en Meierie, dor kunnst Du to seggen, un de hett mi an de Bost leggt — un ik heff tolangt. Jungedi, dat weer en Vergneugen! Weet ik noch nipp un nau.

Nu heff ik fein slopen un ok 200 g mehr op de Woogschool bröcht.

„Sehen Sie“, seggt de Oberschwester, „auch die alten Mütter haben nicht immer Recht.“

Twee Doog loter is se to freuh in den Sool opdükert un hett glieks Alarm geben. Ik heff leber nix seggt un noch gau ’n Sluck nohmen. Dor keem ok al „Weiße Wolke“: „Was ist hier los? Sie haben zugefüttert, ohne zu fragen?" UNERHÖRT!

„Woso?!", hett Mudder antert. „De Deern hett jümmers schreet. Ik heff nich noog Melk un se is nicht satt worrn. Un de Oberschwester hett mi dat nich glöövt un dor heff ik eben de Sook sülven in de Hand nohmen. De Erfolg liggt doch op de Hand — un op de Woogschool."

De Dokter treckt de Stirn kruus un süht nu jüst so ut as all de lütten Schietbüdels.


"Schiet-Buddel, ik will Bost!"

„Die Frau hat Recht, zufüttern.“ Nu geev dat wat ut de Buddel. Schood, dat anner weer beter.

Dat is hüüt jo allens anners. Dat gifft nu Melk online. Wo dat geiht? Mit’n Schlauch an’n Reekner? Orrer mit’n Stick? Nee, dat’s ’n ganz vigelienschen Kroom.

De Melk, de Mudder nicht bruukt, ward kontrolleert un achterno kümmt se in den Froster. Op de Website steiht denn: "Muttermilch Babyalter PLZ Preis".

Süh, villicht wohnt de Mama mit de grote Meierie jo glieks üm de Eck.

Un worüm gifft dat nu so’n Website? Jüst ut den sülvigen Grund as dortomolen: Zufüttern? Unerhört. De Melk kümmt eenfach in den Ausguss.

Ober mol ehrlich. Wi Kinner kümmt dorbi wedder to kott. Wat harrn wi söss lütten Puper för’n Spooß in uns Stuuv, dortomolen negenteihnhunnert-scheet-mi-doot. Wi hebbt schreet, spuckt, puupt, Jungens un Deerns tosomen. Scheun weer dat.

Na, denn man Prost mit Mudderglück. Eierlikör mit Kirschlikör.



11.5.2014


na baven