Gedanken öber dat Mittenanner

vun Heinz Tiekötter

Ik much geern mol mit uns leben Gott snacken. Ik würr em denn vertellen, worüm dat mit sien Lüüd op de Eer nich so recht klappt. Wenn ik di to'n Bispeel froog: Wat is di lebber, Striet un Zank orrer 'n godet Verhältnis to de Minschen üm di rüm? Ik weet all, wat du anters. Du weerst jo dösig, wenn di nix an Harmonie liggt. Un wenn ik 'n Buddhisten, 'n Muslim, 'n Juden or en vun de Natur-Religion froog; de Antwurt vun de Kloken is jümmers de sülbige. Se wüllt Freden hebben, se wüllt keen Bang hebben, se wüllt keen Sorgen för de Tokunft hebben un se wüllt Harmonie.

Man de Weg dorhen beginnt jo nich in de grote Politik. De beginnt vör uns Huusdöör. De beginnt twüschen di un mi. Go ik an Sünndag in de Kark, denn heur ik de Verkünnigung. Dat is heel wichtig för de Kark un de Konfesschoon. Dormit wüllt se ehre Lüüd tosomen holln. Doch veel wichtiger is, dat mien Leben sik ok denn verännert, wenn ik mol nich öber Gott un de Welt nodink. Wenn ik mi dormit beschäftige, doröber notodinken, op welk Ort ik mit di un mit den Minschen umgohn warr, de mi as neegstet in de Mööt kümmt. Wat heff ik mit em vör? Wie war ik mi verholl'n?

War ik em beurdelen no dat, wat he anhett, wat för'n Sprook or Dialekt he snackt, of he 'n Boort or lange Hoor or gorkene hett? Un wokeen sall in uns tokünftig Verhältnis to'nanner den Anfang moken? He or ik. Ik bün jo öller. Gifft mi dat 'n Vörrecht or hollt mi dat vun wat af? Is de Schangs dorför all vörbi, wenn ik to lang dorop tööv, dat he endlich anfangt?

Worüm goh ik di nu all mit mien Gedanken op'n Keeks? Wi sünd doch grod anfungen öber uns Mittenanner notodinken. Un du hest seggt, du harrst doch Intresse an Harmonie. Hest du seggt! Wenn se in de Karken, de Tempels un de Moscheen nich toerst doröber nodinken wurrn, op welk Ort se ehre Macht un den Influss op de Mächtigen bewohren köönt, wenn se nu doröber grübeln wurrn, op welk Ort se ehr Leben un dat mit ehre Mitminschen 'n lüürlüttbeten kommodiger gestalten köönt, denn weern wi all mittenanner 'n Stück wieder op den rechten Weg.

Köönt uns welk dorvun afhollen, dat wi dat eenfach mit'n anner versöcht? Ik heff mi fast vörnohmen, morgen fang ik dormit an! Un wat warst du moken?