De direkte Droht

vun Heinz Tiekötter

As Geschäftsmann is Hannes veel ünnerwegens. He ritt 'n Barg Kilometers af. Mol fohrt he mit de Bohn un mol mit sien egen Auto. Geiht dat ober öber gröttere Strecken, denn nümmt he meist den Fleger. Öber Hannes kannst veel lachen. He is 'n humorvullen Minschen un hett jümmers Grappen in'n Kopp. He meent, he bruukt dat. Dat sall em vun den velen Stress befreen.

Wenn Hannes in'n Fleger stiggt un en nette Stewardess nümmt em in Empfang, denn geiht dat glieks los mit Spijöök: "Frollein", süüfzt he denn, "mi geiht dat hüüt nich so good, ik feuhl mi bannig plümerant. Ik mutt miene Pillen nehmen. Ik kenn dat al. Bringen Se mi doch gau 'n Glas Woter." De Stewardess nickköppt, markt sik sienen Platz un seggt em dat to, as bald dat se in de Luft sünd.

Un wenn nu den Luftkutscher siene Stimm ut den Luudspreker kümmt, dat de Lüüd sik afschnallen köönt, denn fangt Hannes sien lütt Schauspeel an: Öber elkeen Sitz gifft dat jo düsse Luftdüsen vun de Klima-Anloog. Hannes steiht op, reckt sik opfällig no boben un dreiht een vun de Düsen beten no links, denn dreiht he se 'n beten no rechts, schuuft ehr no vürn un treckt se trüch an sik ran.

Dat fallt op un mookt de anner Lüüd neeschierig un se fangt an, na em hentokieken un em to beobachten. Denn stellt Hannes sik op de Teenspitzen, dreiht de Düüs noch neger an sik ran, as wenn dat 'n Mikrofon weer, un röppt dor luud rin: "Frollein, bitte een Glas Woter. Platz C in de achte Reeg!"

De Mitflegers schüttköppen un lachen öber düssen narrschen Kerl. De een orrer annere fangt ook an, sik Sorgen to moken, wat dor villicht noch wat achteran kümmt, wat em in Gefohr bringt. Hannes seggt, dat de Oort un Wies, mit de de Lüüd op sien Spijöök reagiert, em reinweg ut de Tüüt bringt.

Denn nu kümmt nämlich sien groten Ogenblick: "Du musst denn mol in de unglöövschen Gesichter vun de Minschen kieken, wenn se seht, dat de Stewardess mit mien Glas Woter kümmt!"