Plögers Hein

vun Friedrich Ehlbeck


To'n Anhören hier klicken:

Lesen deit Friedrich Ehlbeck in holsteiner Platt.

As he up sien Trecker seet
un fleit sien La-Paloma-Leed,
mök em dat sicher veel Vergnögen.
Plögers Hein, de wör bi't Plögen.
Dat Fröhstück wör al lang vertehrt.
Von Plog dat grote Rad wör schmeert.
De Klock wör eben so na ölben
un güng so langsam na de Twölben.
Wiel dat uck al warmer wör,
bruk he siene Jack nich mehr.
He harr se öbern Tuhnpahl hungen,
wieter plögt un fleit un sungen.
He har datt Plögen richtig lehrt,
bloß fleiten nich — he fleit verkehrt.

In de Weide stünn de Koh,
de keek den Hein bi't Plögen to.
Se schlög den Takt mit ehren Steert
to Hein sien Leed — uck ganz verkehrt.

"Dat Hein hier plögt, dat is man schön,
denn bün ick nich so ganz alleen.
Wenn sien Leeder uck nich dögen doot,
to'n Ünnerplögen sünd se goot."

En Oss freet in de Weid dor blangen,
mit den wör uck nix antofangen,
wodörch se rein ut Langewiel
na Hein un sienen Trecker schiel.
Hein plög ümmer hin und her,
bald wör dat denn nix Nees mehr.
Se wör dat leed, na em to pliern,
so langsam kreeg se dat Marschiern.
Schritt för Schritt in aller Roh
güng se up Hein sien Jacken to,
muus dor an rüm mit ehre Schnut —
plumps, füll dor de Breeftasch rut.
Ut'neengeklötert vördweer un verdwast
leeg de Papierkram nu in Gras.
Frät ick hüt mol wat to'n lesen
un nich bloß ümmer Gras un Besen."
Dat harr se jo noch nie nich seen:
Führerschien Klass twee un een!
Se noch mol öbert Paßbild leckt,
üm vörtoschmecken, wie dat schmeckt.
Dennso füng se an to kaun
(is beter wegen dat Verdaun!).

Hein har noch nich to Enne fleit,
he von sien Trecker rünnerneiht
— (damit man's hochdeutsch auch versteht:
"runnerneiht" heißt "runtergenäht".)
Denn he seeg dat denn jo bald,
löp na de Koh un röp: "Halt, halt!"
De Koh, de schaff dat grad noch jüst —
he har dat eher ropen müßt.
Hein keek vergrellt — de Koh, de grien,
verschwunnen weer de Föhrerschien.
Weern denn bloß noch so'n poor Rekenstücken
von Dieselöl un Reifenflicken.
Wieder fünn de Hein nix mehr,
wat noch beten wichtig weer.
Nu frag ick di: "Watt seggst dorto?"
Woto? To Plögers Hein sien Koh.

He hett ehr öbern Puckel strakt,
un da hett se een Föhrerschien maakt.



25.5.2014


na baven