Dat kannst mi glööven!
In'n Häven kann hei wedder lopen

vun Hubert Looschen

To'n Anhören hier klicken:

Lesen deit Hubert Looschen.

Ehr Säöhn, hei hett Oliver, wör 5 Johr — 'n lüttken, quicklebendigen Jung'n, immer in Bewägung, leiwer loopen at gaohn. Van eine up dei annere Sekunde wüdd dat Läwen vanne Familje ganz ümmedraiht. Dei Junge lööp uppe Straoten, liek vör 'n Auto. Drei Wäken uppe Intensivstation, dann eine lange Reha. Upgäben köm för dei Mam'm nich in Fraoge. Uck nich, at immer klorer wüdd, ehr Säöhn kunn nich wedder so wern, at hei maol wör.

Vandaoge, säben Johr läöter, verstaiht sei den Unfall at 'ne Upgaobe för sick. Ne Upgaobe van Gott, van Straofe will sei nix wäten. "Wenn du so wat dörstaohn un utholln moss, dor wasses du bi", is ehr klor worn. Oliver kann nix mehr alleine, brukt för aals Hülpe. Dei Frau frait sick äöwer ehrn Mann, dei immer in'n Huse is, sick üm den Säöhn kümmert. Sei frait sick äöwer Olivers Brauer, veier Johr öller. Sei kann gor nich vertelln, wat aals in üm vör sick gaiht, wo gaut hei mit sien'n lüttken Brauer ümmegaiht.

Einmaol in aal dei Johrn is sei heller dull worn. At ehr Junge wägen eine schwore Lungenentzündung in ein Krankenhuus leeg, frögen dei Doktors, off sei üm nich bestimmte Medikamente gäwen schulln, hei wüdd ja doch nich old. Dat was ehr tau väle. "Wat bildet dei Lüe sick in! Dei sünd doch nich Gott!"

Dat Läwen van dei Familije werd vandaoge van ehrn Jung'n bestimmt. Sei mäöt aals gaut plaonen. Dat dait dei Mam'm uck, nimmp sick aower uck immer wedder maol Tiet för sick alleine, off mit ehrn Mann un maol mit Fründinnen. Mangers hilpet ehr, wenn sei unnere Dusche staiht un mit dat Waoter van baoben ehre Traonen kaomt. Aober dann rischket sei sick wedder up, dann gaiht 't wieder. Dei Familje brukt ehr. Wenn sei dann an't Bedde van Oliver steiht un hei luut lachet, weil in'n Fernseher wat Lustiges löpp, dann gaiht dat Harte up. Un dei Globen hilpet ehr. Sei glöwet: In'n Häven kann Oliver wedder lopen.

"Du kanns mit jede Upgaobe wassen, du kanns ut aals wat Gaues trecken", giff sei mi nao use Gespräch mit up'n Weg. Wenn du mit Olivers Mam'm schnackes, ehrn Maut un ehr Denken begripps, dann kumps in't Naodenken, wenn du maol äöwer eigene lüttke Malessen klaoges.

Bi us up plattpartu.de finnt man nu utsöchte Bidräge van disse Radiosendung.