Dat kannst mi glööven!
Wat för't Harte daun

vun Hubert Looschen


To'n Anhören hier klicken:


Lesen deit Hubert Looschen.



Mangers fraoge ick mi: Wat bliww van dien Läwen, wenn du d'r nich mehr büs? Wat behollt dei Lüe van di? Use Pastor sägg bi jede Beerdigung tau dei Gemeinde: Nich wat du besäten häss, wat di hört häff, äöwerläwet den Dod. Wat du wäsen büs, dat bliww.

Wat van di bliww, dor gifft eine schöne Geschichte van. Ein Pap'n van twei Junges wüdd old. Hei markde, dat dat tau Enne güng. Har hei siene beiden Junges dat Richtige för't Läwen bibrocht? Hei schickde siene Säöhns inne Welt. Sei schulln Späuers leggen, Späuers, dei immer bliewet un nich vergaoht.

Dei beiden möken sick up'n Weg. Dei erste bünt Gräss tau lüttke Bünne un lä sei up'n Weg, schneet Teiken un lüttke Biller inne Böme, gröw hier un dor ein Lock.
Dei annere güng los, schnackde mit dei Lüe, danzde un fierde mit ehr, bröchde Spaoß un Fraide in dat Läwen van dei Lüe, wecker üm äöwer 'n Weg löpen, mök Maut, wenn se nich wieder wüssden.

At dei beiden Junges trügge kömen, sä dei Pap'n: Nu laot us tauhoope jauen Weg naogaohn. Dann käön' wi seihn, wat van jau bläwn is. Dei Grässbünnel van den ersten harn sick uplösett, wörn viellicht van Deierde fräten worn. Dei Böme mit dei Schnitkereien wörn ümmewaiht, harn dei Lüe daolschlaon un dat Holt bruukt. Dei Löcker, wecker hei graowen har, wörn tauwaiht, nich mehr tau seihn.

Ganz anners wör dat bi den tweiden. Immer, wenn dei Pap'n mit siene Junges in ein Dörp köm, löpen dei Menschken, Junge un Olde, den Säöhn taumööte, fraiden sick, dat se üm wedder sehgen, laord'n üm in ehre Hüser tau'n Äten un Fiern.

Wedder tauhuuse ankaomen, sä dei Vaoder tau den ersten Säöhn: Du büss fliedig wäsen, häss ne ganze Riege Teiken achterlaoten, häss Späuers leggt. Van diene Arbeit is aower nix bläwen. Dien Spauer, diene Teiken kanns nich mehr finnen.
Tau den tweiden sä dei Vaoder: Du häss Späuers un Teiken in dat Harte van dei Menschken achterlaoten. Wat in't Harte geiht, bliww alltied.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


25.11.2018


na baven