Dat kannst mi glööven!
At wenn 't mien Kind is

vun Diakon Hubert Looschen, Garrel

To'n Anhören hier klicken:

Lesen deit Hubert Looschen.

Vandaoge fiert dei katholschken Karken dat Fest Mariä Himmelfohrt. För väle Lüe in Europa is dat so wichtig, dat 'n Fierdag is. Mariä Himmelfohrt will us säggen, dat Maria nao ehrn Dood mit Liew un Säle in'n Himmel upnaohmen worn is. För ehr Upstaohn giff dat kiene Tügen, so as dat bi ehr'n Säöhn Jesus wör. Man kennt uck nich ehrn Dodesdag. Fräuher vertellden dei Lüe, dat Maria in ein Graw leggt worn is, wor man einen grooten Stein vörrullt har. So wör dat uck bi Jesus wän. Hei sülwes schall kaomen wän un häff ehr ut das Graw haolt un mit in'n Himmel naohmen.

Bild: Ludgerd Lüske

Maria ist wedder ganz dichte bi ehrn Säöhn. So wör dat ja uck in sien Läwen. Sei stünd immer achter Jesus, häff aals daon, dat hei groot wer'n kunn. Sei heff dat Läwen un dat Krüüz mitdraogen.

Wenn 'n Kind Piene häff, wenn d'r Sorgen kaomt, wenn 'n Kind nich wieder weit, an'n Ende is — dei Mamm' is immer dor. Disse Fierdag vandaoge lehrt us, dat dat uck in'n Dood kien Ende nimmp. So as Maria un Jesus nao dat Läwen up dei Ern in Himmel wedder tauhoope sünd, so werd dat uck kaomen för aale Mamms un uck aale Pappens up dei ganzen Welt.

Dorüm is disse Dag dat wert, dat wi fiert. Marias Himmelfohrt wiest us den Weg. Sei verklaort us, wor't eines Daoges mit us hengeiht.

Wenn ick Marias Läwen bedenke, kummp mi noch ein annern Gedanken. Wie wör dat, wenn wi aale in use Schnacken, Daun un Denken äöwer un mit annere Menschken us vörstellt, dat dei annere use Kind is? Wie wör dat, wenn wi aale Menschken, dei dichte bi un uck dei wieder wäge sünd, annähmen kunn'n wie us eigen Kind? Den Flüchtling, den äseligen Naober, Lüe, wor ick mit in'n Striet ligge, mit den aohne Dack över'n Kopp, wecker för'n Baohnhof tau Bädeln sitt, mit Lüe, wecker dat immer bäter wät't un alltied Recht häbbet?

Mariä Himmelfohrt sägg mi, dat Maria un Jesus ganz dichte bi'n anner sünd. Wenn ick dat 'n bitken bäter begriepen will, dann mott ick mit jeden so ümmegaohn, wie dat eine Mauder mit ehr Kind dait. Wenn du dat dais, leiwe Tauhörerin, leiwe Tauhörer, is jeder Dag ein Fierdag.