Dat kannst mi glööven!
Tied laoten!

vun Diakon Hubert Looschen, Garrel


To'n Anhören hier klicken:


Lesen deit Hubert Looschen.


Wenn man vandaoge Lüe fröög, wat ehr am meisten fählt, dann kann man at Antwort hörn: Tied! Väle Lüe häbbt kien Tied. Dat gaiht van einen Termin nao'n annern. Dei Kalenner ist proppenvull. Arbeit un Beruf verlanget di aals off, du moss alltied för dei Firma praotstaohn. Fraulüüe versorget ehre Kinner un gaoht uck ehrn Beruf nao. Dat heet dann "Vereinbarkeit van Familije un Beruf". Lichter säggt as daohn, dat aals unner ein'n Haut tau bringen. Un dann is dor ja uck noch dei Freitiet un dat Hobby. Du moss wat daun för dei Gesundheit, för dei Fitness. Un wenn eis krank büss, mott dat uck drocke gaohn mit dat Gesundweern.

Wi Menschken sünd immer in Iele, immer unnerwägns. Bi aal dei Iele geiht eine wichtige Tugend verlorn: Dei Geduld. Teuben käön'n, sick Tied laoten, maol offschalten, ruhig wern — dat helpet mehr, at wenn't aale man tau, man tau gaiht.

Mit dei Geduld is dat man so'ne Saoke. Dor was maol ein Enkel, dei köm tau Beseuk bi sienen Opa. In'n Gorn fünd hei 'ne lüttke Schildkröte. Junges mäöt ja aals fort unnerseuken. So möök hei dat uck mit dei Kröte. Mit ein'n lüttken Stock woll hei se ut ehr Hüüsken haolen. Aower sei trück sick trügge. Sei verkröp sick in ehr Huus, in ehrn Panzer. Aals Puulen hülp nix, dei Junge köm d'r nich an.

Dei Opa har sien' Enkel bi dat Drieben taukäken. Hei wull nich häbben, datt dat Tier so quält wüdd. "Du möcks dat verkehrt", sä dei Opa. "Kumm mit in't Huus, ick wies di, wie man dat möck." Hei nöhm dei Schildkröteun sett'de sei up 'n warmen Kachelaoben. Dat düürde nich lange, do keek sei mit ehrn lüttken Kopp ut dat Hüüsken un krööp nao den Jungen hen.

"Menschken sünd mangers at Schildkröten", sä dei Opa. "Wenn du se dwingen wullt, treckt sei sick trügge. Dais du ehr Warmte, büss du gaut tau ehr, dann verlaotet sei ehrn Panzer."

Leiwe Tauhörerinnen un Tauhörer! Wenn 't nich fort klappt, wenn dei Lüe di'n bäten butt kaomt un villicht lünks liggen laotet — dann bruukt sei 'n bitken mehr Tied. Wat us leiw worn is, häff ja uck lange bruukt. Wat us leiw is, dor laot't wi us lange Tied för.

Laot di Tied mit aals, wat di wichtig un leiw is. Geduld is nich bloß för Schildkröten gaut.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


5.3.2017


na baven