Dat kannst mi glööven!
Upstaohn un neie Wäge gaohn

vun Diakon Hubert Looschen, Garrel


To'n Anhören hier klicken:


Lesen deit Hubert Looschen.


Wenn Kinner van'n Kinnergorn inne Schaule kaomt, lehrt sei annere Lüe kennen, dei in ehr Läwen wichtig werd un wichtig sünd. Dei Lüttken laot't up ehre Lehrerin nix kaomen. Wat dei sägg, dat stimmt. Dor kanns at Mam'n oder Pap' nix gägen maoken.

Annere Lüe int' Läwen sünd gaut, richtig un wichtig, in jedet Öller. Lüttke un Groote bruuket Menschken. Dei bringet neie Gedanken, wieset annere Wäge. Wäge, dei ick gor nich seihn häbbe, Gedanken, dei mi noch gor nich kaomen sünd. Un up Maol sütt dat Läwen ganz anners ut. — Ich häbb dat begräpen, at ick disse Geschichte hörde:

Ein'n olden Mann läwede mit sien' Säöhn up'n lüttken Hof. Sei harn bloß ein Perd, dat bruckden sei för dei Arbeit up'n Acker. Ehr Land bröchde jüss naug, dat sei dor van läben kunnen.
Eines Daoges lööp dat Perd weg. Dei Lüe ut dat Dörp kömen un röpen: "Wat för'n grootet Unglück!" — Dei olde Mann sä: "Wecker weit, wor't gaut för is!"

Eine Wäken läöter köm dat Perd weer mit 'n grooten Köppel Wildperde. Dei Lüe ut't Dörp kömen wehr. "Wat ist dat doch ein grootet Glück!" — "Wecker weit, wor't gaut för is", sä dei olde Buur...

Dei Junge wull ein't van dei Peerde inrien, wüdd aober afschmäten un brök sick ein Bein. Dei Olde mössde dei ganze Arbeit alleine maoken. "Wat för'n grootet Malör", säen dei Lüe ut dat Dörp. — "Wecker weit, wor't gaut för is", sä dei olde Mann.

Paor Daoge läöter bröök in dat Land ein Krieg ut. Dei Soldaoten kömen und nöhmen aale jungen Kerls mit anne Front. Väle kömen ümme. Den Säöhn harn se nich mitnaohmen, hei har ja sien Bein braoken.


Foto: Antje Heßler

Wecker weit, wor't gaut för is. Ick wünschke us aale, leiwe Tauhörinnen un Tauhörer, dat wi wer upstaohn käönt, wenn wi fallen sünd, dat wi wiedergaohn käönt, dat wi neie Wäge find. Egaol wat d'r kummp: Wecker weit, wor't gaut för is!


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


27.11.2016


na baven