Passion 2013
Krüzwegstationen

mit de Biller van Sankt Marien in Varrelbusch.
De Biller köönt Se per Klick vergröttern!



1 - Jesus werd tau'n Dood verurdeilt.

"Wat schall ick mit Jesus maoken, van den man sägg, dat hei dei Messias wän schall?", wull Pilaotus wäten. "An't Krüz mit üm!", röpen dei Lüe. "Wat hätt hei denn Leipet daon?", frög Pilaotus. Man dei Lüe röpen blots noch luuter: "An't Krüz mit üm!" Pilaotus sehg, dat hei nich wieder köm. Jüst dat Gägendeil passeierde, dat Spektaokel wörd immer maller. Hei löt sick Waoter bringen, waschkede sick vör dat heele Volk dei Hannen un sä: "Ick bün nich schullig an den Dood van dissen Mann. Wat nu afflöpp, dat is jau Wark." Don röp dat heele Volk: "Dei Schuld an sienen Dood schall us un use Kinner anräket wern!" Dornao geef Pilaotus den Barabbas frei. Jesus aower löt hei bestrieken un dei Soldaoten schullen üm dornao an't Krüz schlaon.

Matthäus 27,22-26

2 - Jesus nimmp dat Krüz up siene Schullern.

Dei Soldaoten van den Gouverneur bröchden Jesus in't Prätorium un dei heele Mannschkup stellde sick üm Jesus ümmetau. Sei trücken üm ut un hüngen üm einen scharlachroten Mantel äöwer, wünnen ut Dornentäuger eine Krone, settden üm dei up den Kopp un drückden üm einen Stock in dei rechte Hand. Dornao kneiden sei vör üm daol, röpen üm mit Spott tau: " Läben schall dei Juden ehr Käönig!" Sei spütterden üm an, nöhmen den Stock un schlögen üm dormit up den Kopp. Naodem sei mit üm so ehren Spott dräben harn, trücken sei üm den Mantel ut un trücken üm sien eigen Tüg wedder an. Dornao nöhmen sei üm mit, un wullen üm an't Krüz schlaon.

Matthäus 27,27-31

3 - Jesus fallt tau'n eiersten Maol unner dat Krüz.

Use Krankheit, hei hätt dei draogen, un use Piene, hei nöhm dei up sick. Wi dachden, Gott har üm bestraoft, har üm schlaon un daolböget. Aower man hätt üm dörbohrt wägen use Schuld, hätt üm wägen use Sünnen quält. För usen Freeden hüllt hei dei Piene ut, un wi werd dör siene Seers heielt. As Schaope haren wi us aale verloopen; jederein'n güng sienen Weg. Man üm dö Jahwe dei heele Schuld uplaoden.

Jesaja 53,4-6


4 - Jesus dröpp siene Mauder.


Simeon sägnde Maria, dei Mauder van Jesus, un sä ehr tau: "Hei ist dörför utsöcht, dat väle in Israel an üm tau Fall kaomet un väle dör üm uprischket werd. Hei schall ein Teiken wän, dat man wedderspräken werd, so daone, dat uck di ein Schwert dör dei Säle stäken dait. Aower dordör werd man bi väle tau seihn kriegen, wat för Gedanken dei in't Harte häbbet."

Lukas 2,34f

5 - Simon van Zyrene helpet Jesus dat Krüz drägen.

As sei dei Stadt verlöten, dröpen sei einen Mann, dei Simon heet un ut Zyrene stammde. Den dwüngen dei Soldaoten, för Jesus dat Krüz tau drägen.

Matthäus 27,32

6 - Veronika giff Jesus dat Schweitdauk.

As einen bedreuwden Kien wassde hei vör üm up, as ein Kien ut schraoen Bodden. Hei was nich staotschk un uck nich moje. Hei was gräsig, un hei gefüllt us nich. Hei wörd verachtet, un aale güngen üm ut'n Weg. Hei har weuste Piene, wüß wat Lien heit, as ein'n, den sien Utseihn man nich mehr aff kann. Hei wörd minne achtet, un uck wi dön üm verachten.

Jesaja 53,2-3

Mien Harte denkt an dien Wort: "Seuket mien Angesicht!" Dien Angesicht, Herr will ick seuken. Verstopp dien Gesicht nich vör mi; wies dienen Knecht in Dullheit nich aff! Du büs miene Hülpe worn. Verstöt mi nich, verlaot mi nich, du Gott, mien Heil!"

Psalm 27,8-9

7 - Jesus fallt tau'n tweiden Maol unner dat Krüz.

Ick bün dei Mann, dei lien möß unner dei Pietschken in siene Wut. Mi dreef hei weg un löt mi gaohn, in'n Düstern, aohne Lecht. Mit Steinbunken hätt hei mi den Weg taustellt , mi up den Padd verdwälen laoten. Use Krone häbbet wi verlorn. Leip is't mit us wägen use Sünnen.

Klagelieder 3,1-2,9,16

8 - Jesus dröpp dei krieten Fraulüe.

Jesus dreihde sick nao ehr ümme un sä: Gi Fraulüe van Jerusalem, krietet nich äöwer mi! Krietet äöwer jau sülwes un äöwer jaue Kinner. Et kummp eine Tied, dor werd man säggen: "Glück för dei Fraulüe, dei unfruchtbor sünd malläwe kien Kind up dei Welt bröchden un stillden. Denn werd man tau dei Barge säggen: "Fallt up us daol!" un tau dei Höchten: "Begraowt us!" Wenn man all mit dat greune Holt so ümmegeiht, wat schall denn eiers mit dat utdrögte passeiern?"

Lukas 23,28-31

9 - Jesus fallt tau'n darden Maol unner dat Krüz.

Gaut is dat för jederein'n, dat hei van jung off an ein Jück drägen dait. Sitten schall hei einsaom un still, wenn man üm dat uppleggen dait. Den Mund schall hei up den Bodden drücken, vellicht giff et noch ein Haopen. Dei Backe schall hei henhollen nao den, dei üm schleit un aal dat Schellen uthollen. Man nich för Alltied werd us dei Herrgot afflähnen. Wenn hei uck Leid bring, so erbarmt hei sick wedder dör siene grote Gautheit.

Klagelieder 3,27-32

10 - Jesus werd dat Tüg wegnaohmen.

So kömen sei an eine Stäe, dei Golgata off Schädelstäe neumt wörd. Dor geef man Jesus vergällten Wien. As hei dorvan probeiert har, wull hei den nich mehr drinken. Naodem dei Soldaoten Jesus an't Krüz schlaon harn, schmeeten dei dat Los üm sien Tüg un deilden dat unner sick up. Denn settden dei sick bi dat Krüz daol un hüllen Wacht.

Matthäus 27,33-36

11 - Jesus werd an't Krüz schlaon.

Äöwer den Kopp van Jesus haren sei eine Upschrift fastemaoket, dei den Grund för sien Urdeil wiesde: "Dit is Jesus, dei Käönig van dei Juden." Tausaome mit üm wörden twei Verbräkers an't Krüz kaomen, dei eine up dei rechte un dei annere up dei lünke Siete van üm. Dei Lüe, dei vörbi güngen, schüttkoppden un röpen mit Spott: "Du wulls doch den Tempel daolrieten un in drei Daoge wedder upbawen! Wenn du Gott sien Säöhn büs, denn help di sülwes un stieg van dat Krüz aff. Jüst so möken dei üppsten Presters un Schriftkünnigen Witze äöwer üm. "Annere hätt hei holpen, aower sick sülwes kann hei nich helpen ", spotteden sei. "Hei is jao dei Käönig van Israel! Wenn hei nu van't Krüz affstiegen dait, denn werd wi an üm glöwen."

Matthäus 27,37-42

12 - Jesus starwt an't Krüz.

Üm twölf Uhr middaogs köm Daok äöwer dat heele Land, dei bit drei Uhr nömdaogs duurde. So üm drei Uhr bölkede Jesus luut: "Eli, Eli, lema sabachtani?" (Dat heit: "Mien Gott, mien Gott, worümme häs du mi verlaoten?") Wekke van dei ümtaustaohn Lüe säen, as dei dat hörden: "Hei röpp Elia." Forts löp ein'n los un haolde einen Schwamm, dukede den in Wienessig, steek den up eine Spielen un hüllt den Jesus tau'n Drinken hen. "Teuwet", röpen dei annern, "wi willt seihn, off Elia kummp un üm rettet!" Jesus aower bölkede noch maol luut ut sick rut; denn störw hei. In den süftigen Oogenblick reet dei Vörhang in'n Tempel van baoben bit unnen twei; dei Eern füng an tau bäwern, dei Felsen sprüngen in Dutt, un dei Graffstäen güngen aopen. Väle van dei dooen Hilligen waokden up. Dei kömen nao Jesus sien Wedderupstaohn van den Dooen ut ehre Graffstäen, güngen in dei hillige Stadt un löten sick bi väle Lüe seihn. Dei Hauptmann un dei Soldaoten, dei mit üm tausaome bi den an't Krüz hangen Jesus waoken dön, harn sick weust verfehrt äöwer dei bäwern Eern un dei annern Saoken, dei sei mitbeläwed harn, un säen: "Disse Mann was wohrhaft Gott sien Säöhn."

Matthäus 27,45-54

13 - Jesus werd van't Krüz affnaohmen un in den Schoot van siene Mauder leggt.

Nu güng Josef, ein Mann ut Arimatäa, nao Pilaotus un frög üm, off hei den dooen Liew van Jesus van dat Krüz affnähmen dröff. Josef was ein Jünger van Jesus, aower blots stillken, hei was bange vör dei üppsten Juden. As hei van Pilaotus dat Verlöw krägen har, güng hei nao dei Henrichtungsstäe un nöhm den dooen Jesus aff.

Johannes 19,38

14 - Dei hillige Lieknaom van Jesus werd in't Graff leggt.

Josef nöhm den dooen Liew un wickelde üm in ein reinet Linnendauk un lä üm in dat noch nich brukte Graff, dat hei för sick sülwes in einen Felsen schlaon löt. Vördem hei weggüng, rullde hei einen groten Stein vör den Ingang van dat Graff. Maria ut Magdala un dei annere Maria wörn dor mit bi; sei harn sick up dei annere Siete van dat Graff daolsettet.

Matthäus 27,59-61


Utwahl un Südollnborger Platt: Ludgerd Lüske

29.3.2013


na baven